امبانی فیملی کے ذاتی چڑیا گھر میں نایاب برازیلی طوطوں نے نیا عالمی تنازعہ کھڑا کردیا

دو سال سے زیادہ عرصے سے تین براعظموں کے حکام اس نایاب برازیلی طوطے پر بحث کر رہے ہیں جسے 2019 ءمیں جنگلی حیات میں معدوم قرار دیا گیا تھا۔ تنازعہ اس وقت شدت اختیار کر گیا جب یہ انکشاف ہوا کہ ایسے 26 طوطے بھارت میں امبانی خاندان کے زیر انتظام خیراتی ادارے کی نجی چڑیا گھر میں موجود ہیں۔

یہ کہانی ایک پرندے اور ایک خاندان کی ہے مگر یہ نہ کوئی عام پرندہ ہے اور نہ ہی عام خاندان۔

طوطا سیکس کی کہانی

سیکس مکاؤ ایک شوخ نیلا طوطا ہے جس کے تولیدی انداز خاصے پیچیدہ ہیں۔ اسے 2019ء میں جنگلی ماحول سے معدوم قرار دیا گیا۔ بعد ازاں افزائش کے خصوصی پروگرام کے تحت اس کی کچھ نسلیں دوبارہ برازیل واپس بھیجی گئیں۔

گذشتہ ہفتے بھارتی محققین نے امبانی فیملی کے "وانتارا اینیمل ریسکیو اینڈ ری ہیبیلیٹیشن سینٹر" کو کسی خلاف ورزی سے بری قرار دیا، تاہم یورپی حکام نے واضح کیا ہے کہ وہ یہاں بھیجے جانے والے ہر جانور کی کڑی نگرانی کر رہے ہیں۔ برازیل، جرمنی اور بھارت یہ معاملہ اقوام متحدہ کے اس ادارے کے ذریعے سلجھانے کی کوشش کر رہے ہیں جو جنگلی حیات کی عالمی تجارت کی نگرانی کرتا ہے۔

امبانی خاندان اور ونتارا سینٹر

گجرات میں واقع 3500 ایکڑ پر پھیلا ونتارا سینٹر تقریباً دو ہزار اقسام کا مسکن ہے۔ یہ مرکز گزشتہ سال اس وقت عالمی میڈیا کی توجہ کا مرکز بنا جب آننت امبانی کی شادی سے پہلے کی تقریبات میں ایوانکا ٹرمپ اور مارک زکربرگ جیسے مہمان شریک ہوئے۔

مارچ میں بھارتی وزیراعظم نریندر مودی نے اس چڑیا گھر کا افتتاح کیا جو امبانی فیملی کی ریلائنس انڈسٹریز کی تیل ریفائنری کے قریب قائم ہے۔

رائیٹرز کے مطابق 2022 سے اب تک اس سینٹر نے جنوبی افریقہ، وینزویلا، کانگو اور متحدہ عرب امارات سمیت مختلف ملکوں سے نایاب جانور درآمد کیے ہیں۔ ان میں تقریباً 2900 سانپ، 1400 سے زائد کچھوے، 219 شیر، 149 چیتے، 105 جراف، 62 شیمپینزی، 20 گینڈے اور دیگر کئی نایاب انواع شامل ہیں۔

یہ درآمدات بظاہر 90 لاکھ ڈالر مالیت کی ظاہر کی گئی ہیں، تاہم مرکز کا کہنا ہے کہ یہ صرف شپنگ اور انشورنس کے اخراجات ہیں، جانوروں کی خریداری کے عوض کوئی تجارتی ادائیگی نہیں کی گئی۔

برازیل کی تشویش

سب سے بڑا تنازع سیکس مکاؤ طوطے کے گرد ہے۔ برازیل کا مؤقف ہے کہ اس نے ان پرندوں کو بھارت بھیجنے کی اجازت نہیں دی۔ برازیلی حکومتی ادارے کے مطابق ونتارا ابھی تک اس عالمی پروگرام کا حصہ نہیں بنا جو اس پرندے کی بقا کے لیے ضروری ہے۔

برازیل نے پچھلے سال جرمن تنظیم ACTP کے ساتھ معاہدہ ختم کر دیا تھا جس کے ذریعے یہ طوطے بھارت پہنچے۔ برازیلی حکومت کا الزام ہے کہ یہ اقدام تجارتی نوعیت کا تھا، اگرچہ تنظیم اس الزام کو رد کرتی ہے۔

جرمنی کی وزارت ماحولیات نے بتایا کہ اس نے 2023 میں "نیک نیتی" کی بنیاد پر بھارت منتقلی کی اجازت دی تھی لیکن بعد میں برازیل کی مشاورت کے بعد مزید منتقلی روک دی گئی۔

بھارتی سپریم کورٹ کی نگرانی

بھارت کی سپریم کورٹ نے اگست میں حکم دیا کہ ونتارا سینٹر کے جانوروں کے حصول اور دیکھ بھال کے طریقہ کار کی قانونی حیثیت جانچی جائے۔ عدالت کو گزشتہ ہفتے پیش کی گئی رپورٹ کے مطابق محققین نے کسی خلاف ورزی کے شواہد نہیں پائے۔

ہاتھیوں کے لیے پاپ کارن تک

آج یہ سینٹر محض چند سالوں میں بنجر زمین سے جدید سہولتوں والے سبزہ زار میں بدل چکا ہے۔ میڈیا کو دی گئی سیر کے دوران آننت امبانی نے باورچی خانے بھی دکھائے جہاں ہاتھیوں کو انعام کے طور پر پاپ کارن اور دیگر نایاب خوراک فراہم کی جاتی ہے۔

وزیراعظم مودی نے حالیہ دورے میں ننھے شیروں، ہاتھیوں، گینڈوں اور جرافوں کو کھلایا اور اسی موقع پر ان کے ہاتھ پر ایک نایاب سیکس مکاؤ طوطا بیٹھا دیکھا گیا۔

بھارتی حکومت نے جنیوا میں اجلاس کے دوران ونتارا کا دفاع کرتے ہوئے اسے "خطرے سے دوچار انواع کی بقا کے لیے تسلیم شدہ مرکز" قرار دیا۔

یہ معاملہ اب بھی عالمی توجہ کا مرکز ہے اور برازیل، بھارت اور جرمنی کے درمیان مذاکرات جاری ہیں تاکہ ان نایاب طوطوں کا مستقبل طے کیا جا سکے۔