اسرائیلی حکومت کی جانب سے غزہ میں جنگ بندی اور قیدیوں کی رہائی کے معاہدے کی منظوری کے چند ہی گھنٹے بعد، جمعے کی صبح اسرائیلی طیاروں نے جنوبی غزہ کے شہر خان یونس پر شدید فضائی حملہ کیا۔
اس کے علاوہ "العربیہ" کے نمائندے کے مطابق اسرائیلی توپ خانے نے وسطی غزہ کے علاقے میں النصیرات کیمپ کے شمالی حصے کو بھی نشانہ بنایا۔
اسرائیلی حکومت نے جمعے کو علی الصبح حماس کے ساتھ جنگ بندی کے معاہدے کی منظوری دی، جس کے نتیجے میں آئندہ 24 گھنٹوں میں لڑائی رکنے اور 72 گھنٹوں کے اندر اسرائیلی قیدیوں کی رہائی کی راہ ہموار ہو گئی ہے۔
روئٹرز کے مطابق اسرائیلی کابینہ نے یہ منظوری ثالثی ممالک کی جانب سے اسرائیلی قیدیوں کی رہائی کے بدلے فلسطینی قیدیوں کی رہائی پر مبنی معاہدے کا اعلان کیے جانے کے ایک روز بعد دی۔ یہ اقدام امریکی صدر ڈونلڈ ٹرمپ کے اُس امن منصوبے کے پہلے مرحلے کا حصہ ہے جس کا مقصد دو سال سے جاری غزہ کی جنگ کا خاتمہ ہے۔
یاد رہے کہ امریکی صدر ڈونلڈ ٹرمپ نے بدھ کی شام اعلان کیا تھا کہ اسرائیل اور حماس کے درمیان "غزہ منصوبے" کے پہلے مرحلے پر اتفاق ہو گیا ہے۔ اس میں جنگ بندی اور قیدیوں کے تبادلے کی شقیں شامل ہیں۔
یہ معاہدہ 7 اکتوبر 2023 کے حملے کے دو سال مکمل ہونے کے صرف ایک روز بعد سامنے آیا۔ مصر کے شہر شرم الشیخ میں ہونے والے بالواسطہ مذاکرات کے نتیجے میں امریکی امن منصوبے کے 20 نکاتی خاکے کے پہلے مرحلے پر اتفاق رائے طے پایا، جس کا مقصد غزہ کی جنگ ختم کرنا ہے۔
