مصر میں قطری سفارت خانے نے اتوار کے روز ایکس پر ایک پوسٹ میں کہا کہ قطر کے اعلیٰ سرکاری ادارے امیری دیوان کے تین ملازمین مصر میں بحیرۂ احمر کے تفریحی شہر شرم الشیخ کے قریب گاڑی کے ایک حادثے میں ہلاک ہو گئے۔
سفارت خانے نے کہا کہ دیگر دو افراد زخمی ہیں اور ان کا شہر کے ہسپتال میں ضروری طبی علاج جاری ہے۔
اس میں کہا گیا ہے کہ اتوار کے روز بعد میں زخمیوں اور ہلاک شدگان کی میتوں کو دوحہ واپس بھیج دیا جائے گا۔
قبل ازیں دو سکیورٹی ذرائع نے رائٹرز کو بتایا تھا کہ قطری سفارت کاروں کو لے جانے والی ایک گاڑی شہر سے 50 کلومیٹر (31 میل) کے فاصلے پر سڑک کے ایک موڑ پر الٹ گئی۔
اس ہفتے کے شروع میں شرم الشیخ میں قطر، ترکیہ اور مصر کے حکام بالواسطہ مذاکرات میں شریک ہوئے جن کے نتیجے میں اسرائیل اور حماس صدر ٹرمپ کے غزہ امن منصوبے کے پہلے مرحلے پر متفق ہو گئے۔ یہ حادثہ اس پیش رفت کے چند دن بعد پیش آیا۔
مصری شہر پیر کو ایک عالمی سربراہی اجلاس کی میزبانی کرنے والا ہے جس کا مقصد معاہدے کو حتمی شکل دینا ہے۔
