امریکی صدر ڈونلڈ ٹرامپ نے کہا ہے کہ یوکرین کو روس کے ساتھ جنگ ختم کرنے کے لیے مجوزہ امریکی منصوبے کو اگلے جمعرات سے قبل منظور کرنا ہو گا ۔ انہوں نے اسے کیف کے لیے جنگ روکنے کا صحیح وقت قرار دے دیا۔
ٹرمپ نے جمعہ کو "فاکس نیوز ریڈیو" کے ساتھ ایک انٹرویو میں مزید کہا کہ اگر جنگی کارروائیاں جاری رہیں تو یوکرین لازمی طور پر ڈونباس کے باقی ماندہ حصوں کو کھو دے گا۔ معاہدے پر پہنچنے کے لیے مجوزہ تاریخ مناسب ہے۔
ترامپ نے اس بات پر زور دیا کہ روسی صدر ولادیمیر پوتین مزید جنگوں کے خواہاں نہیں ہیں۔ اگر پوتین نے بالٹک ممالک پر حملہ کرنے کا سوچا تو وہ انہیں روکنے کی صلاحیت رکھیں گے۔ ایک دوسرے سیاق میں ٹرمپ نے "فاکس نیوز" کو بتایا کہ ان کی انتظامیہ نے ایران کے حجم کو کم کرکے مشرق وسطیٰ پر چھائے کالے بادل کو دور کر دیا ہے۔
ٹرمپ نے مزید کہا حزب اللہ اچھی پوزیشن میں نہیں ہے۔ انہوں نے تہران کے ساتھ کسی معاہدے تک پہنچنے کا امکان ظاہر کیا۔ یوکرین کے صدر ولادیمیر زیلینسکی نے جمعہ کو خبردار کیا تھا کہ اگر ان کا ملک واشنگٹن کے جنگ ختم کرنے کے منصوبے کو مسترد کرتا ہے تو وہ امریکی حمایت کھو سکتا ہے۔ انہوں نے ایک ویڈیو پیغام میں کہا کہ یوکرین کو ایک بہت مشکل انتخاب کا سامنا ہو سکتا ہے۔ وقار کھو دینا یا ایک اہم شراکت دار کو کھونے کا خطرہ مول لینا۔
امریکی دباؤ
رائٹرز نے باخبر ذرائع کے حوالے سے بتایا ہے کہ کیف کو واشنگٹن کی طرف سے معاہدے کی منظوری کے لیے شدید دباؤ کا سامنا ہے جس میں انٹیلی جنس معلومات اور ہتھیاروں کی فراہمی روکنے کی دھمکیاں شامل ہیں۔ امریکہ یوکرین سے مطالبہ کر رہا ہے کہ وہ جمعرات تک معاہدے کے فریم ورک پر دستخط کردے۔ متعدد ذرائع نے انکشاف کیا کہ 28 شقوں پر مشتمل امریکی منصوبے میں یوکرینی فریق کی طرف سے وسیع تر رعایات شامل ہیں جبکہ کیف نے پہلے اپنے علاقے سے متعلق کسی بھی رعایت کو دینے سے انکار کر دیا تھا۔
منصوبے کے تحت یوکرین ڈونباس خطے میں لوہانسک اور ڈونیٹسک کے علاقوں کو چھوڑ دے گا۔ اس کے علاوہ روس کے ساتھ 2014 میں شامل کیے گئے جزیرہ نما کریمیا کو ایک حقیقی روسی علاقہ تسلیم کرے گا۔ یہ منصوبہ جنوبی علاقوں خیرسن اور زاپوریژیا میں لائن آف کنٹرول کو منجمد کرنے کا بھی مطالبہ کرتا ہے جنہیں ماسکو نے ضم کرنے کا اعلان کیا تھا۔ منصوبہ کیف کو نیٹو میں شامل ہونے کی کوشش ترک کرنے، اپنے علاقے کے اندر بین الاقوامی افواج کی تعیناتی کی منظوری نہ دینے اور 100 دن کے اندر انتخابات کروانے کا پابند کرتا ہے۔
یوکرین میں دو وزراء کو معزول کرنے والے کرپشن سکینڈل کے تناظر میں ایک شق غیر ملکی امداد کے جائزے سے متعلق تھی جسے ہٹا دیا گیا اور اس کی جگہ "عام معافی" کی تجویز دی گئی ہے۔ فرانس پریس کو ایک سینئر امریکی عہدیدار نے یہ بتایا ہے۔ یوکرینی عہدیدار رستم عمروف نے بالواسطہ طور پر اس کی تردید کی ہے۔
