مودی کے دورہ اسرائیل سے قبل بھارت کا اپنے شہریوں کو ایران چھوڑنے کا حکم

بھارتی وزارت خارجہ نے پیر کے روز اپنے شہریوں کو ایران چھوڑنے کی ہدایت کی ہے جس کی وجہ تہران پر ممکنہ امریکی حملے کے بڑھتے ہوئے خدشات بتائے جا رہے ہیں۔

تہران میں قائم بھارتی سفارت خانے نے سوشل میڈیا پر جاری ایک بیان میں کہا ہے کہ ایران کی موجودہ صورتحال کے پیش نظر وہاں موجود بھارتی شہریوں کو مشورہ دیا جاتا ہے کہ وہ تجارتی پروازوں سمیت دستیاب ذرائع سے ملک چھوڑ دیں۔

بھارتی وزارت خارجہ کے تخمینے کے مطابق اس وقت ایران میں تقریباً دس ہزار بھارتی شہری مقیم ہیں۔

نئے اتحاد کی دستک

یہ وارننگ ایک ایسے وقت میں سامنے آئی ہے جب بھارتی وزیر اعظم نریندر مودی بدھ کے روز اسرائیل کا اہم دورہ کرنے والے ہیں جو دونوں ممالک کے درمیان بڑھتے ہوئے تعاون کی علامت ہے۔

اسرائیلی وزیر اعظم بنجمن نیتن یاھو نے اپنی کابینہ کے اجلاس کے آغاز میں اعلان کیا کہ نریندر مودی اسرائیلی پارلیمنٹ (کنیسٹ) سے خطاب کریں گے۔ انہوں نے حالیہ برسوں میں دوطرفہ تعلقات میں ہونے والی پیش رفت کو بھی سراہا۔

بنجمن نیتن یاھو نے اس بات پر زور دیا کہ اسرائیل مشرق وسطیٰ کے اندر اور باہر ایسے نئے اتحاد بنانے کی کوشش کر رہا ہے جو اقتصادی، سفارتی اور سکیورٹی تعاون پر مبنی ہوں تاکہ ان کے بقول مشترکہ انتہا پسند دشمنوں کا مقابلہ کیا جا سکے۔

مستحکم دوستی

دوسری جانب نریندر مودی نے سوشل میڈیا پلیٹ فارم ایکس پر ایک پوسٹ میں کہا کہ وہ اپنے دورے کے دوران نتیجہ خیز بات چیت کے منتظر ہیں۔ انہوں نے اشارہ دیا کہ ان کا ملک اسرائیل کے ساتھ اپنی مستحکم دوستی کو بہت اہمیت دیتا ہے جو اعتماد، جدت اور امن و ترقی کے مشترکہ عزم پر مبنی ہے۔

واضح رہے کہ نریندر مودی نے سنہ 2017ء میں اسرائیل کا پہلا دورہ کیا تھا جو کسی بھی بھارتی وزیر اعظم کا پہلا دورہ اسرائیل تھا، جس کے جواب میں بنجمن نیتن یاھو نے اگلے سال بھارت کا دورہ کیا تھا۔