ربوٹ کی گھریلو کاموں میں مہارت:صفائی ستھرائی اور کھانا بنانے کی ویڈیو وائرل

چین کے مشرقی صوبے جیانگ سو کے شہر سوژو میں باضابطہ طور پر دنیا کے پہلے گھریلو روبوٹ کا مشاہدہ کیا گیا جسے گھریلو ماحول میں ضم کر دیا گیا ہے۔ یہ قدم مصنوعی ذہانت کی ٹیکنالوجی میں ہونے والی اس ترقی کی عکاسی کرتا ہے جو اب لیبارٹریوں سے نکل کر روزمرہ کی زندگی میں منتقل ہو رہی ہے۔

یہ روبوٹ آپ کو صبح سویرے جگانے، گھر کے برقی آلات چلانے، چیزوں کی ترتیب و آرائش اور انہیں سنبھال کر رکھنے کے ساتھ ساتھ کھانا پکانے کی صلاحیت بھی رکھتا ہے، جس سے مصنوعی ذہانت حقیقی معنوں میں روزمرہ زندگی کا حصہ بن گئی ہے۔

روبوٹ نے اپنے دن کا آغاز صارف کو صبح جگانے، پردے ہٹانے، بستر درست کرنے اور ناشتہ لا کر دینے سے کیا، جس کے بعد اس نے صارف کو الوداع کہا اور گھر کی صفائی ستھرائی اور ترتیب میں مصروف ہو گیا۔

اس نے گھر کے آلات چلائے، سامان کو اپنی جگہوں پر رکھا اور کھانا تیار کیا، جو کہ سمارٹ ہوم کے تصور کا ایک عملی نمونہ ہے۔

ماہرین کا خیال ہے کہ یہ قدم "مجسم مصنوعی ذہانت" کے میدان میں ایک اہم پیش رفت ہے، کیونکہ یہ ٹیکنالوجی اور گھریلو ماحول کے درمیان بہتر تال میل پیدا کر کے مستقبل کی ذہین زندگی کو حقیقت کے قریب لانے میں مددگار ثابت ہو رہا ہے۔