موبائل فون اور سوشل میڈیا پر پابندی، کولمبین گلوکارہ کے ہاں بچوں کی پرورش کے اصول

کولمبیا کی معروف گلوکارہ شکیرا نے بچوں کی جانب سے سوشل میڈیا کے استعمال کے حوالے سے ایک سخت موقف اپنایا ہے۔ انہوں نے انکشاف کیا ہے کہ ان کے دونوں بیٹوں کے پاس اپنے موبائل فون نہیں ہیں اور ڈیجیٹل پلیٹ فارمز تک ان کی رسائی مکمل طور پر نگرانی میں ہوتی ہے، یہاں تک کہ انہوں نے یوٹیوب پر پابندی لگانے کا بھی ایک بڑا فیصلہ کیا ہے۔

ہسپانوی اخبار مارکا کے مطابق شکیرا نے واضح کیا کہ ان کے دونوں بچے سمجھدار ہیں لیکن اس کے باوجود وہ انہیں کچھ مخصوص ڈیجیٹل جگہوں سے دور رکھنے کو ترجیح دیتی ہیں۔

عوامی تشہیر اور تنقید سے تحفظ

انہوں نے مزید بتایا کہ ان کا طریقہ کار بچوں کو یہ سکھانا ہے کہ بیرونی دنیا میں کون سی چیزیں انہیں نقصان پہنچا سکتی ہیں اور انہیں یہ جاننے کی ضرورت نہیں کہ لوگ کیا کہہ رہے ہیں یا کیا سوچ رہے ہیں، بلکہ انہیں زندگی کی اہم تفصیلات پر توجہ دینی چاہیے۔ انہوں نے اشارہ دیا کہ "انہیں اپنا نام، میرا نام یا اپنے والد کا نام سرچ کرنے کی ضرورت نہیں ہے"۔ اس طرح وہ انہیں عوامی سطح پر ہونے والی تشہیر اور انٹرنیٹ پر ان کے خاندان کے بارے میں کہی جانے والی باتوں سے محفوظ رکھنا چاہتی ہیں۔

اس کے بجائے وہ کوشش کرتی ہیں کہ ان کی توجہ بنیادی اور سادہ چیزوں سمیت ان حقیقی تجربات پر مرکوز رہے جو سکرین سے نہیں ملتے اور جن سے نشہ یا عادت پیدا نہیں ہوتی۔

آج کل بچوں کے پاس موبائل فون ہونا اور سوشل میڈیا تک رسائی ایک عام بات بن چکی ہے۔ بچے ان پر طویل وقت گزارتے ہیں ۔ جب انہیں اس سے روکا جاتا ہے تو وہ بے چینی اور مایوسی کا شکار ہو کر غصے کا اظہار کرتے ہیں۔ اگر بچپن سے ہی درست رہنمائی نہ ملے تو وہ اکثر خود پر قابو پانے میں ناکام رہتے ہیں۔ شکیرا نے اس بات پر زور دیا کہ وہ اپنی ذاتی زندگی میں بھی اسی اصول پر عمل پیرا ہیں۔ انہوں نے اعتراف کیا کہ وہ خود بھی سوشل میڈیا پر اپنے بارے میں کہی جانے والی باتوں کو نہیں دیکھتیں بلکہ وہ ان سے دور رہنے اور صرف اپنی ٹیم سے تعریفی کلمات سننے کو ترجیح دیتی ہیں۔