برازیل میں پیش آنے والے ایک ہول ناک واقعے میں شادی کی رات... اچانک مہمانوں کی آنکھوں کے سامنے ایک لرزہ خیز قتل میں بدل گئی۔
تفصیلات کے مطابق34 سالہ خاتون نازیلا دویاناس کی زندگی کی وہ رات، جسے خوب صورت ترین ہونا چاہیے تھا، اس وقت ایک سانحے میں تبدیل ہوگئی جب اس کے 55 سالہ دولہے ڈانیل باربوزا نے سب کے سامنے اسے بے رحمی سے قتل کر دیا۔ باربوزا ایک میونسپل گارڈ کے طور پر ملازمت کرتا ہے۔
میگزین "People" کے مطابق اس ہول ناک واقعے کا آغاز دلہن اور اس کے شوہر کے درمیان ہونے والے ایک شدید جھگڑے سے ہوا۔ یہ جھگڑا اچانک اس وقت شدت اختیار کر گیا جب شوہر نے اپنا سرکاری اسلحہ نکالا اور مہمانوں کی موجودگی میں بیوی پر گولی چلا دی۔ ظلم کی انتہا یہیں ختم نہیں ہوئی، بلکہ ملزم فرار ہوا اور پھر دوبارہ واپس آکر موت سے جدوجہد کرتی دلہن پر مزید گولیاں چلائیں تاکہ اس کی موت یقینی بنائی جا سکے۔
تحقیقات سے معلوم ہوا ہے کہ مقتولہ دلہن سابقہ ازدواجی تعلق سے تین بچوں کی ماں تھی اور اس کے خاندان کے افراد حالات بگڑنے سے قبل ہی بچوں کو تقریب کی جگہ سے بحفاظت نکالنے میں کامیاب ہو گئے تھے۔ اس طرح بچے اپنی ماں کو عروسی لباس میں قتل ہوتے ہوئے دیکھنے کے منظر سے بچ گئے۔
ایک مشکوک رویے میں مجرم نے اپنی گرفتاری اور اسلحہ و گولیوں کے خول قبضے میں لیے جانے سے قبل، خود اپنے دفتر (میونسپل گارڈ) کو فون کر کے اپنے جرم کی اطلاع دی۔
دوسری جانب برازیلی حکام نے عوامی غم و غصے کے درمیان ملزم کو دانستہ قتل کے الزام میں احتیاطی حراست میں لینے کا اعلان کیا ہے۔
میونسپل گارڈ کی قیادت نے اس گھناؤنے جرم میں اپنے ایک اہل کار کے ملوث ہونے پر صدمے اور افسوس کا اظہار کرتے ہوئے عدلیہ کے ساتھ مکمل تعاون کی یقین دہانی کرائی ہے۔
