ایرانی 'قدس فورس' کے کمانڈر کی اسرائیل کو دھمکی

ایرانی سرکاری میڈیا نے آج جمعرات کے روز پاسدارانِ انقلاب کی قدس فورس کے کمانڈر اسماعیل قاآنی کے حوالے سے بتایا ہے کہ اسرائیل کو اپنی مرضی سے تمام لبنانی علاقوں سے انخلا کر لینا چاہیے ورنہ اسے شکست کھا کر بھاگنے پر مجبور کیا جائے گا۔

ایرانی قدس فورس کے کمانڈر نے کہا کہ "اگر اسرائیل آج رضاکارانہ طور پر جنوبی لبنان سے انخلا نہیں کرتا تو کل اسے شکست کھا کر بھاگنا پڑے گا۔"

اسرائیلی اور لبنانی اعلیٰ حکام نے جمعرات کو جنوبی لبنان سے کسی بھی قسم کے اسرائیلی انخلا کی تردید کی ہے۔ یہ تردید ایک ایسے امریکی عہدیدار کے بیان کے بعد سامنے آئی ہے جس میں کہا گیا تھا کہ اسرائیل نے لبنانی حکومت کے لیے خیر سگالی کے جذبے کے تحت علاقے سے اپنی کچھ فوجیں واپس بلا لی ہیں۔

اسرائیل اور لبنان امریکہ کی حمایت یافتہ ایک ایسی تجویز پر بات چیت کر رہے ہیں جس کے تحت اسرائیلی افواج حزب اللہ تنظیم کے ساتھ جنگ کے دوران قبضے میں لیے گئے لبنانی علاقوں کا کچھ حصہ لبنانی فوج کے حوالے کر دیں گی، تاکہ لبنان مقبوضہ علاقوں پر دوبارہ کنٹرول حاصل کرنے کی جانب پیش قدمی کر سکے۔

"تجرباتی علاقہ" قائم کرنے کی تجویز واشنگٹن میں لبنان اور اسرائیل کے درمیان ہونے والی بات چیت کے تازہ ترین دور کا حصہ ہے۔ اگرچہ ایران کی جانب سے لبنانی معاملے کو امریکہ کے ساتھ اپنے مذاکرات میں شامل کرنے کی کوششوں کے باعث اس کی رفتار مدھم پڑ گئی ہے۔

امریکہ اور ایران نے گذشتہ ہفتے ایک عبوری معاہدے پر دستخط کیے تھے جس میں بشمول لبنان تمام محاذوں پر لڑائی ختم کرنے پر اتفاق کیا گیا ہے۔

دونوں ممالک نے لبنان کی خود مختاری اور علاقائی سالمیت کی ضمانت دینے کا عہد کیا ہے، جس کا مطلب تہران کے لیے یہ ہے کہ جنوبی لبنان سے اسرائیلی افواج کا انخلا نا گزیر ہے۔