امریکہ، کینیڈا اور میکسیکو باہر، ورلڈ کپ میچوں کے ٹکٹوں کی قیمتوں میں کمی

کسی قوم کی مصیبتیں دوسری قوم کے لیے فائدے کا باعث ہوتی ہیں۔ یہ جملہ مصر اور ارجنٹائن کی ٹیموں کے درمیان راؤنڈ آف 16 کے میچ پر صادق آتا ہے جس میں ارجنٹائن دو گول سے پیچھے ہونے کے بعد میچ کے آخری منٹوں میں 3 گول کر کے مصر کے خلاف واپسی کرنے میں کامیاب رہا۔ اپنے سٹار لیونل میسی کی قیادت میں ارجنٹائن کی ٹیم کا ورلڈ کپ 2026 سے باہر ہونا ٹورنامنٹ میں شائقین کی دلچسپی میں کمی کے ساتھ بڑے معاشی نقصانات کا باعث بنتا۔ اس ورلڈ کپ میں اب تک برازیل، جرمنی اور پرتگال جیسی عالمی سٹارز پر مشتمل بڑی ٹیمیں باہر ہو چکی ہیں۔

ویب سائٹ "یاہو سپورٹس" کی ایک رپورٹ ، جس کا "العربیہ بزنس" نے مشاہدہ کیا ہے، کے مطابق اس صورت حال میں ورلڈ کپ 2026 کے باقی میچوں کے ٹکٹوں کی قیمتوں میں کمی آگئی ہے، خاص طور پر ٹورنامنٹ کے تین میزبان ممالک امریکہ، میکسیکو اور کینیڈا کے راؤنڈ آف 16 سے باہر ہونے کے بعد بھی میچوں کی ٹکٹوں کی قیمتوں میں کمی آئی ہے۔ اس کا مطلب ہے کہ ان ملکوں کے شائقین کی اپنے سٹیڈیمز میں ہونے والے میچوں میں دلچسپی کم ہو گئی ہے۔

پلیٹ فارم ’’ گیم ٹائم ‘‘ کے ڈیٹا کے مطابق کوارٹر فائنل کے چاروں میچوں کے ٹکٹوں کی قیمتوں میں 10 دن سے زیادہ پہلے کی اپنی بلند ترین قیمتوں کے مقابلے میں 50 فیصد سے زیادہ کی کمی واقع ہوئی ہے۔

کوارٹر فائنل میچوں کے ٹکٹس

فرانس اور مراکش کے میچ میں ٹکٹ کی کم سے کم قیمت 1018 ڈالر تک پہنچ گئی۔ اوسط قیمت 1696 ڈالر ریکارڈ کی گئی اور سب سے زیادہ قیمت 11.3 ہزار ڈالر رہی جو 24 جون کو 3222 ڈالر کی بلند ترین قیمت سے 66 فیصد کم ہے۔ جہاں تک سپین اور بیلجیم کے میچ کا تعلق ہے، ٹکٹ کی کم سے کم قیمت 1317 ڈالر تک پہنچ گئی، اوسط قیمت 2769 ڈالر ریکارڈ کی گئی اور سب سے زیادہ قیمت 123.9 ہزار ڈالر رہی یہ 24 جون کو 4740 ڈالر کی بلند ترین قیمت سے 68 فیصد کم ہے۔

ناروے اور انگلینڈ کے میچ میں ٹکٹ کی کم سے کم قیمت 1647 ڈالر رہی، اوسط قیمت 3428 ڈالر ریکارڈ کی گئی، اور ٹکٹ کی سب سے زیادہ قیمت 19.7 ہزار ڈالر تک پہنچ گئی۔ یہ 24 جون کو 3888 ڈالر کی بلند ترین قیمت سے 57 فیصد کم ہے۔ ارجنٹائن اور سوئٹزرلینڈ کے میچ میں ٹکٹ کی کم سے کم قیمت 1574 ڈالر رہی، اوسط قیمت 3168 ڈالر ریکارڈ کی گئی اور ٹکٹ کی سب سے زیادہ قیمت 11.29 ہزار ڈالر تک پہنچ گئی۔ یہ بھی 24 جون کو 4246 ڈالر کی بلند ترین قیمت سے 63 فیصد کم ہے۔

سیمی فائنل اور فائنل میچز

سیمی فائنل اور فائنل میچوں کے ٹکٹوں کی قیمتیں بھی متاثر ہوئی ہیں۔ اگرچہ کوالیفائی کرنے والی ٹیموں کے لحاظ سے قیمتوں میں شدید اضافہ دیکھا گیا ہے۔ پہلے سیمی فائنل میچ میں ٹکٹ کی کم سے کم قیمت 2320 ڈالر رہی، اوسط قیمت 5193 ڈالر ریکارڈ کی گئی اور ٹکٹ کی سب سے زیادہ قیمت 19.4 ہزار ڈالر تک پہنچ گئی جو 24 جون کو 4931 ڈالر کی بلند ترین قیمت سے 42 فیصد کم ہے۔

دوسرے سیمی فائنل میچ میں ٹکٹ کی کم سے کم قیمت 2708 ڈالر رہی، اوسط قیمت 6152 ڈالر ریکارڈ کی گئی، اور ٹکٹ کی سب سے زیادہ قیمت 31.8 ہزار ڈالر تک پہنچ گئی جو 24 جون کو 5645 ڈالر کی بلند ترین قیمت سے 52 فیصد کم ہے۔ ورلڈ کپ 2026 کے فائنل میچ میں ٹکٹ کی کم سے کم قیمت 9015 ڈالر رہی، اوسط قیمت 16.9 ہزار ڈالر ریکارڈ کی گئی اور سب سے زیادہ قیمت 67.6 ہزار ڈالر تک پہنچ گئی جو 24 جون کو 11.1 ہزار ڈالر کی بلند ترین قیمت سے 20 فیصد کم ہے۔

میسی کا مارکیٹنگ اثر

پلیٹ فارم ’’ سسٹم ون ‘‘کے ڈیٹا کے مطابق لیونل میسی ورلڈ کپ کی تقریباً ایک چوتھائی بڑی اشتہاری مہمات میں نظر آئے جہاں انہوں نے ورلڈ کپ کی 80 بڑی اشتہاری مہمات میں سے 18 میں حصہ لیا۔ یہ اعداد و شمار بتاتے ہیں کہ میسی ورلڈ کپ کی سب سے بڑی اشتہاری مہمات میں سے تقریباً 22 فیصد میں موجود ہیں۔

ان میں انٹرنیشنل فیڈریشن آف فٹ بال ایسوسی ایشن "فیفا" کے متعدد بڑے آفیشل سپانسرز کی مہمات بھی شامل ہیں۔ میسی نے قطر میں ہونے والے ورلڈ کپ 2022 کے دوران برانڈز کے لیے اپنی اہمیت ثابت کی تھی جہاں ان کی قیادت میں چلنے والی مہمات نے سوشل میڈیا پلیٹ فارمز پر مستقل طور پر سب سے زیادہ انگیجمنٹ ریٹ حاصل کیے تھے۔