ایران نے معاہدہ توڑ دیا ہے، ہم آبنائے ہرمز کا کنٹرول سنبھالیں گے : ٹرمپ

امریکہ کے صدر ڈونلڈ ٹرمپ نے کہا ہے کہ ان کا ملک آبنائے ہرمز پر کنٹرول حاصل کر کے اس کا انتظام سنبھال سکتا ہے۔ انہوں نے اشارہ دیا کہ ایرانی مذاکرات کاروں نے معاہدہ توڑ دیا ہے۔

فوکس نیوز کے ساتھ ایک ٹیلی فونک انٹرویو میں آج پیر کے روز ٹرمپ نے ایران پر امریکہ کے ساتھ سابقہ مفاہمت سے پیچھے ہٹنے کا الزام عائد کرتے ہوئے کہا کہ ان کے درمیان ایک معاہدہ تھا، لیکن ایران نے اسے توڑ دیا... اور وہ برے لوگ ہیں۔

ٹرمپ نے مزید کہا کہ امریکہ آبنائے پر کنٹرول حاصل کرے گا اور شاید اس کا انتظام بھی سنبھالے گا۔ امریکہ آبنائے کا محافظ بنے گا اور شاید اسے آبنائے کا نگران فرشتہ کہا جائے اور اس کام کے بدلے امریکہ کو معاوضہ ملنا چاہیے۔ ان کا ماننا ہے کہ دنیا کی اہم ترین آبی گزرگاہوں میں سے ایک کی حفاظت کے عوض امریکہ کو مالی معاوضہ ملنا چاہیے۔

ادھر تہران میں وزارت خارجہ کے ترجمان اسماعیل بقائی نے کہا کہ ایران آبنائے ہرمز کو اپنی قومی سکیورٹی کے لیے خطرہ بننے کی اجازت نہیں دے گا۔ انہوں نے کہا کہ امریکہ کی جانب سے تجارتی جہازوں کو فوجی سکیورٹی فراہم کرنے کا بیان خطے میں بد امنی برقرار رکھنے کی واشنگٹن کی خواہش کی تصدیق کرتا ہے۔

ایرانی پاسداران انقلاب نے بھی کہا کہ تہران واشنگٹن کو آبنائے ہرمز کے انتظام میں مداخلت کی اجازت نہیں دے گا۔ ایران امریکی جانب سے ایرانی اجازت کے بغیر آبنائے کو عبور کرنے کی کسی بھی کوشش کا سختی سے جواب دے گا۔

امریکہ نے اتوار اور پیر کی درمیانی شب ایران پر بم باری کی، جس کے جواب میں ایران نے خلیجی ممالک کو نشانہ بنایا۔ یہ آٹھ اپریل کو جنگ بندی کے اعلان کے بعد سے دونوں فریقوں کے درمیان سب سے شدید تبادلہ خیال ہے۔

آبنائے ہرمز واشنگٹن اور تہران کے درمیان حالیہ کشیدگی کا مرکز بنا ہوا ہے۔ ایران کا اصرار ہے کہ آبنائے کی صورت حال جنگ سے پہلے جیسی نہیں رہے گی۔ تہران جہازوں پر سروس فیس عائد کرنے کا ارادہ رکھتا ہے جبکہ واشنگٹن بحری نقل و حمل کی آزادی پر زور دیتا ہے۔

واضح رہے کہ 28 فروری کو ایران پر امریکی اسرائیلی حملے کے بعد مشرق وسطیٰ میں شروع ہونے والی جنگ کے تقریباً 40 دن بعد آٹھ اپریل کو جنگ بندی کا اعلان کیا گیا تھا۔ کشیدگی کے باوجود امریکہ اور ایران نے 17 جون کو قطری اور پاکستانی ثالثی میں مفاہمت کی ایک یاد داشت پر دستخط کیے تھے۔

اس یاد داشت میں تمام محاذوں پر جنگ بندی، آبنائے ہرمز کو دوبارہ کھولنے ایرانی بندرگاہوں سے امریکی پابندیاں اٹھانے اور ایرانی منجمد اثاثوں کا کچھ حصہ رہا کرنے کے نکات شامل تھے۔

ایرانی وزارت خارجہ کے ترجمان نے پیر کو کہا کہ اگر امریکہ نے اپنے وعدے پورے نہ کیے تو تہران اس یاد داشت کی پابندی نہیں کرے گا۔