یمن : اتحادی طیاروں کی بم باری ، حوثی کمانڈر 4 ساتھیوں سمیت ہلاک

یمن کے سرحدی صوبے حجہ میں میدی شہر کے جنوب میں عرب اتحاد کے طیاروں کی بم باری کے نتیجے میں حوثی ملیشیا کا ایک کمانڈر اور مذہبی رہ نما طہ صالح مقبل الاہنومی اپنے چار ساتھیوں سمیت مارا گیا۔

باغیوں کے میڈیا نے بتایا ہے کہ الاہنومی اور اس کے ساتھیوں کو اس وقت نشانہ بنایا گیا جب وہ حوثی جنگجوؤں کو لیکچر دینے کے لیے میدی کے محاذ کی جانب راستے میں تھے۔

یمنی سرکاری فوج نے الجوف صوبے کے مغرب میں واقع المصلوب ضعلے میں کئی نئے ٹھکانوں کو واپس لے لیا ہے جہاں باغی ملیشیا کے عناصر روپوش تھے۔ یہ پیش رفت متحارب فریقین کے درمیان شدید جھڑپ اور باغیوں کے جانی و مادی نقصان کے بعد سامنے آئی۔

ادھر صعدہ صوبے میں عسکری ذرائع نے بتایا ہے کہ منبہ ، برکان ، آل مقنع اور الغور کے علاقوں پر عرب اتحادی طیاروں کی شدید بم باری کے نتیجے میں حوثی ملیشیا کے کئی ارکان ہلاک اور زخمی ہو گئے۔ اس دوران سعودی مشترکہ افواج کی جانب سے کئی علاقوں کو توپوں اور میزائلوں کے ذریعے بھی نشانہ بنایا گیا۔