سُوشی کانفرنس سے قبل اِدلب اور غوطہ میں روسی جارحیت میں اضافہ
روس میں کل منگل کے روز شام کے حوالے سے مقررہ سُوشی کانفرنس کے انعقاد سے قبل روسی اور شامی فضائیہ کے طیاروں نے اِدلِب کے دیہی علاقوں اور مشرقی غوطہ پر بم باری کا سلسلہ تیز کر دیا ہے۔ یہ پیش رفت شامی اپوزیشن کی سپریم مذاکراتی کمیٹی اور دیگر فریقوں کی جانب سے سُوشی کانفرنس میں شرکت سے گریز کے بعد سامنے آئی ہے۔
اس سے قبل شام میں حمیمیم میں روسی فوجی اڈے نے شامی اپوزیشن کو کانفرنس کی دعوت قبول نہ کرنے کے نتائج سے خبردار کیا تھا۔ شامی اپوزیشن کی دھمکی دی گئی کہ اگر اس نے سُوشی میں روس کی جانب سے تیار کردہ سیاسی راستے میں شمولیت اختیار نہ کی تو پھر عسکری آپشن کا سہارا لیا جائے گا۔
ایسا نظر آتا ہے کہ شامی اپوزیشن کے خلاف روسی دھمکیوں پر عمل درامد شروع ہو گیا ہے۔ روسی فضائیہ اور بشار کی فوج کے طیاروں نے درجنوں فضائی حملوں میں اِدلب کے مشرقی دیہی علاقوں کو نشانہ بنایا۔
چند روز قبل ماسکو نے شامی اپوزیشن کے مرکزی علاقوں پر بم باری نمایاں طور پر کم کر دی تھی۔ اس اقدام کا مقصد سُوشی کانفرنس میں شرکت کے لیے شامی اپوزیشن اور عسکری گروپوں کی حوصلہ افزائی کرنا تھا۔
