اقوام متحدہ کا فوری طور پر شام میں جارحیت روک دینے کا مطالبہ

اقوام متحدہ کے سکریٹری جنرل آنتونیو گوتریس نے ہفتے کے روز مطالبہ کیا ہے کہ شام میں جارحیت کا سلسلہ فوری طور پر روک دیا جائے۔ یہ مطالبہ جنگ سے تباہ حال ملک میں اسرائیلی فضائی حملوں کے بعد سامنے آیا ہے۔

اقوام متحدہ کے ترجمان اسٹیفن دوجارک نے ایک بیان میں بتایا کہ سکریٹری جنرل گوترش "شام میں تشویش ناک عسکری جارحیت اور تنازع کی خطرناک حد تک توسیع کو قریب سے دیکھ رہے ہیں"۔

گوترش نے شام اور خطّے میں تمام فریقوں پر زور دیا کہ وہ بین الاقوامی قانون کی پاسداری کریں۔

بیان میں کہا گیا ہے کہ "صرف فروری کے پہلے ہفتے میں فضائی حملوں کے دوران 1000 سے زیادہ شہریوں کے ہلاک و زخمی ہونے کی معلومات موجود ہیں"۔

اسرائیل نے ہفتے کے روز وسیع پیمانے پر فضائی حملے کرتے ہوئے بتایا کہ اس نے شامی اراضی کے اندر "ایرانی اور شامی" اہداف کو نشانہ بنایا۔ یہ کارروائی اسرائیل کی سرحد کے اندر اسرائیلی فضائیہ کا ایک F-16 طیارے کے گرنے کے بعد سامنے آئی۔

اسرائیلی اخبار "ہآریٹز" کے مطابق تقریبا 30 برسوں میں یہ پہلا موقع ہے کہ شام میں حملوں کے دوران طیارہ شکن ہتھیاروں کے سبب اسرائیل اپنے کسی لڑاکا طیارے سے محروم ہو گیا۔