یمنی فوج کی صعدہ میں پیش قدمی ، نئے ٹھکانے آزاد

یمن میں عسکری ذرائع کے مطابق سرکاری فوج نے صعدہ صوبے کے شمالی ضلع رازح میں نئے ٹھکانے آزاد کرا لیے ہیں۔ اس دوران حوثی ملیشیا کے متعدد ارکان ہلاک ہو گئے۔

یمنی فوج کے سیونتھ بریگیڈ کے ذرائع نے بدھ کی شام یمنی میڈیا کو بتایا کہ رازح کے محاذ پر الجثامہ، آل سبتان، القرن، حوالی، تباب، شرقی المقران کے تزویراتی علاقوں کو باغیوں سے واپس لے لیا گیا ہے۔ دو گھنٹے سے زیادہ جاری رہنے والی شدید جھڑپوں میں حوثیوں کے 7 ارکان مارے گئے جب کہ 11 سے زیادہ زخمی ہو گئے۔

اسی علاقے میں اتحادی لڑاکا طیاروں نے حوثی جنگجوؤں کو لے کر جانے والی ایک گاڑی کو تباہ کر دیا۔ علاوہ ازیں حملوں میں باغیوں کی دیگر کمین گاہوں کو بھی نشانہ بنایا گیا۔

دوسری جانب یمن کے لیے اقوام متحدہ کے خصوصی ایلچی مارٹن گریفتھ بدھ کے روز صنعاء میں حوثی قیادت سے ملاقات کرنے کے بعد الحدیدہ شہر کے دورے پر روانہ ہو گئے۔ روسی خبر رساں ایجنسی "اسپٹنک" نے اقوام متحدہ کے ذرائع کے حوالے سے بتایا ہے کہ "مارٹن گریفتھ بدھ کو صنعاء پہنچے تھے۔ انہوں نے وہاں حوثی عہدے داران سے بات چیت کی اور پھر الحدیدہ روانہ ہو گئے۔ گریفتھ الحدیدہ سے اردن کے دارالحکومت عمان کا رخ کریں گے"۔

ذرائع نے تصدیق کی ہے کہ گریفتھ الحدیدہ میں کسی عسکری فریق سے ملاقات نہیں کریں گے۔ ذرائع کے مطابق مارٹن گریفتھ سیاسی عمل کے دوبارہ آغاز کے لیے اقوام متحدہ کے مذاکرات کار ہیں۔