سعودی ولی عہد علاقائی دورے پر بحرین پہنچ گئے

سعودی عرب کے ولی عہد شہزادہ محمد بن سلمان بن عبدالعزیز خطے کے عرب ممالک کے دورے کے دوران متحدہ عرب امارات کے بعد خلیجی ریاست بحرین پہنچ گئے ہیں۔

بحرین کی سرکاری خبر رساں ایجنسی کے مطابق ولی عہد محمد بن سلمان خادم الحرمین الشریفین شاہ سلمان بن عبدالعزیز کی ہدایت پر خلیجی ممالک کا دورہ کررہے ہیں۔ وہ اس دورے کےدوران دوسرے مرحلے پر گذشتہ شام کو منامہ پہنچے جہاں ان کا شاندار استقبال کیا گیا۔

ولی عہد محمد بن سلمان آج بحرینی قیادت سے دو طرفہ امور،علاقائی اور عالمی مسائل پر بات چیت کریں گے۔

خیال رہے کہ ولی عہد محمد بن سلمان نے خلیجی ممالک کا دورہ گذشتہ جمعرات کو امارات سے شروع کیا تھا۔ انہوں نے اماراتی ولی عہد الشیخ محمد بن زاید سمیت دیگر اعلیٰ حکام سے ملاقاتیں کیں جس کے بعد وہ منامہ روانہ ہوگئے تھے۔