الحدیدہ کے لیے 'یو این' مشن کے سربراہ کی سعودی وزیر عادل الجبیر سے ملاقات

یمن کے شہر الحدیدہ میں اقوام متحدہ کے امن مشن کے سربراہ اور بھارت کے سابق جنرل ریٹائرڈ ابھجیت گوہا نے سعودی عرب کے دارالحکومت الریاض میں وزیر مملکت برائے خارجہ امور عادل الجبیر سے ملاقات کی۔

انھوں نے یمن کے محاذ جنگ کی تازہ پیش رفت، بالخصوص الحدیدہ میں قیام امن کے لیے کی جانے والی کوششوں پر تبادلہ خیال کیا۔ ملاقات میں یمنی عوام کے لیے سعودی عرب کی طرف سے مہیا کی جانے والی امداد کا بھی جائزہ لیا گیا۔

سوموار کے روز یمنی حکومت نے اقوام متحدہ سے مطالبہ کیا کہ الحدیدہ کی بندرگاہ اور شہر کا کنٹرول سنبھالنے کے لیے بااختیار مقامی فورسز کے مسئلے کو حل کرنے پر زور دیا۔ حکومت کی طرف سے کہا گیا ہے کہ اقوام متحدہ بندرگاہوں سےحوثی باغیوں کو اسلحہ کی اسمگلنگ اور مالی اعانت اور جنگ کو طول دینے کے مسائل سے نمٹںے کے لیے موثر اقدامات کرے۔

یمنی سیکرٹری خارجہ منصور بجاش نے بھی الریاض میں اقوام متحدہ کے امن مشن کے سربراہ جنرل گوہا سے ملاقات کی ہےاور ان سے الحدیدہ میں اقوام متحدہ کی نگرانی میں امن معاہدے کے نفاذ پرتبادلہ خیال کیا ہے۔