سعودی عرب میں کل اتوار کو قومی ہفتہ برائے انسداد بدمعاشی کے تحت مملکت کے اسکولوں میں بھی بدمعاشی کی روک تھام اور اس حوالے سے طلباءمیں آگاہی مہم شروع کی گئی۔
العربیہ ڈاٹ نیٹ کے مطابق سعودی عرب کے اسکولوں میں غنڈہ گردی کے خلاف آگاہی رضا کارانہ مہم کو سوشل میڈیا پر'بدمعاشی کے خلاف ہم ایک ہیں" کے عنوان کے ساتھ چلایا جا رہا ہے۔
خیال رہےکہ ماہرین نفسیات کے مطابق بدمعاشی اور غنڈہ گردی بھی ہراسانی کی ایک شکل ہے جس میں ایک شخص یا اشخاص دوسرے کو مختلف نوعیت کی اذیت سے دوچار کرتے ہیں۔ بدمعاشی کا شکار ہونے والا شخص عموما کم زورسمجھا جاتا ہے۔ بعض اوقات تو اس کے سنگین نتائج موت تک منتج ہوتے ہیں جب کہ کئی دوسرے واقعات میں اس کے اثرات پوری زندگی محسوس کیے جاتے ہیں۔
ذرائع نے العربیہ ڈاٹ نیٹکو بتایا کہ وزارت تعلیم نے بدمعاشی کی روک تھام کے لیے اسکولوں میں طلباء وطالبات کو اس حوالے سے آگاہ کرنے کا مشن شروع کیا ہے۔ یہ اس لیے کیا گیا تاکہ غنڈہ گردی اور بدمعاشی جیسے مسائل اسکولوں کے طلباء میں نہ پنپ سکیں اور اس طرح کے واقعات کی روک تھام کے لیے طلباء میں صلاحیت بھی پیدا کی جاسکے۔
سعودی عرب میں بدمعاشی کو ایک جرم کے طورپر لیا جا رہا ہے۔ غنڈہ گردی کرنے والے شخص کو متاثرہ شخص کی شکایت پر حراست میں لینے کے بعد اس کے خلاف قانونی کارروائی کی جاسکے گی۔
