اسرائیل کے قاتلانہ حملے میں اسلامی جہاد کے رہ نما حسام ابو ھربید جاں بحق

اسرائیلی فوج نے غزہ کی پٹی پر بمباری کے دوران اسلامی جہاد کے رہ نما حسام ابو ھربید کو ایک قاتلانہ حملے کا نشانہ بنا کر قتل کردیا ہے۔

کمانڈر حسام ھربید کو اسرائیلی فوج نے ایک میزائل حملے کا نشانہ بنایا جس میں وہ اپنے کئی ساتھیوں سمیت ہلاک ہوگئے۔

ادھر اسلامی تحریک مزاحمت 'حماس' کے عسکری ونگ القسام بریگیڈ نے کہا ہے کہ مزاحمت کاروں نے غزہ کے ساحل کے قریب اسرائیل کی ایک کشتی پر راکٹوں سے حملہ کیا ہے۔

دوسری طرف اسرائیلی فوج نے جوابی کارروائی کرتے ہوئے متعدد فلسطینی مزاحمت کاروں کو ہلاک کرنے اور سمندر میں کارروائی کے لیے آنے والی ایک کار کو نشانہ بنا کر تباہ کرنے کا دعویٰ کیا ہے۔

آج سوموار کے روز غزہ کی پٹی سے فلسطینی مزاحمت کاروں نے اسرائیلی شہروں عسقلان، اسدود، بئر سبع اور دیگر مقامات پر راکٹ حملے کیے جن میں متعدد افراد زخمی ہوگئے۔

فلسطینیوں کے تازہ راکٹ حملوں میں 12 اسرائیلی زخمی ہوئے ہیں جن میں سے 8 اسدود شہر سے تعلق رکھتے ہیں۔

ادھر دوسری جانب فلسطینی وزارت صحت نے ایک بیان میں کہا ہے کہ غزہ کی پٹی پر اسرائیلی فوج کی تازہ بمباری میں اب تک 220 نہتے فلسطینی شہید اور 6 ہزار 29 زخمی ہوچکے ہیں۔

اسرائیلی فوج نے آج سوموار کے روز غزہ کی پٹی پر جنگی طیاروں اور بھاری توپ خانے سے شیلنگ کی۔ غزہ میں حماس اور اسرائیل کے درمیان جاری لڑائی دوسرے ہفتے میں داخل ہوچکی ہے۔

اسرائیلی فوج نے تازہ بمباری میں بیت لاھیا کے مقام پر تین میزائل داغے۔ دوسری طرف فلسطینی مزاحمت کاروں نے غزہ سے اسرائیلی کالونیوں پر راکٹوں سے حملے کیے۔

اسرائیلی فوج نے غزہ کی پٹی سے راکٹ حملوں کے خطرے کے پیش نظر سرحد کے قریب بسنے والے آباد کاروں کو ہدایت کی ہے کہ وہ تاحکم ثانی پناہ گاہوں میں رہیں اور باہر نہ نکلیں۔

اسدود میں فلسطینیوں‌کے راکٹ حملوں میں زخمی ہونے والے 8 اسرائیلیوں کو علاج کے لیے اسپتال منتقل کیا گیا ہے۔

اسرائیلی فوج نے دعویٰ‌کیا ہے کہ گذشتہ شب غزہ کی پٹی میں حماس کے زیرزمین سرنگوں کے ایک نیٹ ورک کو نشانہ بنایا گیا ہے۔ فوج کاکہنا ہے کہ غزہ کی پٹی کے شمالی علاقے میں بمباری کے دوران 15 کلو میٹر کے علاقے پر تعمیر کی گئی سرنگوں کو نشانہ بنایا گیا ہے۔

فلسطینی ذرائع ابلاغ کے مطابق قابض فوج نے دیر البلح میں وادی السلقا ، التفاح کالونی اور شمالی غزہ میں جبالیا کیمپ کو نشانہ بنایا جس کے نیجے میں متعدد شہری زخمی ہوگئے۔