امریکی صدر جوبائیڈن اور اسرائیلی وزیر اعظم نیتن یاہو آج جمعرات کے روز دیر گئے بات کریں گے۔ اس امر کی اطلاع اسرائیلی کان ریڈیو نے سفارتی ذرائع کے حوالے سے دی ہے۔
امکانی طور پر اسرائیلی وزیر اعظم نیتن یاہو اپنی ٹیم کے ساتھ بات کریں گے اور حماس کی طرف سے جنگ بندی کے لیے تجاویز پر ریسپانس پر بات کریں گے۔ اسرائیل اورvحماس کے درمیان جنگ نو ماہ مکمل ہونےوالے ہیں۔
جوبائیڈن کی طرف سے پیش کیے گئے جنگ بندی منصوبے پر حماس کا رد عمل اسرائیل کو بدھ کے روز ملا تھا۔ جس پر اسرائیلی وزیر اعظم کے دفتر نے موساد کے جاری کردہ ایک بیان میں کہا تھا کہ اسرائیل حماس کے جواب کا جائزہ لے رہا ہے۔
جوبائیڈن کے اعلان کردہ جنگ بندی منصوبے کے بعد دونوں اہم اتحادیوں کے درمیان یہ انتہائی اہم تبادلہ خیال ہو گا۔ نیتن یاہو اسی ماہ امکانی طور پر امریکی کانگریس کے اجلاس سے بھی خطاب کرنے والے ہیں۔
