اسرائیلی فوج نے اعلان کیا ہے کہ اس نے نصیرات کے علاقے میں سکول کو ایک کور کے طور پر استعمال کرنے والے متعدد دہشت گردوں کو نشانہ بنایا ہے۔ اسرائیلی فوج نے یہ بات پیر کے روز کہی ہے۔
جاری کیے گئے بیان میں کہا گیا ہے 'کچھ ہی دیر پہلے انٹیلی جنس کی بنیاد پر ایک کارروائی کی گئی ہے۔ نتیجتاً کئی دہشت گردوں کو ناکام بنا دیا گیا ہے۔ یہ دہشت گرد علاقے میں موجود ایک سکول کو اپنے جنگی مقاصد کے لیے استعمال کر رہے تھے۔
دریں اثنا نصیرات کے العودہ ہسپتال میں موجود ایک ذریعے نے بتایا ہے 'ایک سکول پر اسرائیلی فوج کے حملے کے بعد متعدد زخمیوں کو ہسپتال زخمی حالت میں لایا گیا ہے۔ ذریعے کے مطابق یہ سکول جو اسرائیلی حملے کا ہدف بنا ہے اقوام متحدہ کے ادارے 'اونروا' کے زیر اہتمام کام کر رہا تھا۔
سکول کو نشانہ بنانے کے بعد بھی اسرائیلی فوج کا یہ کہنا ہے کہ حماس اور اسلامی جہاد بین الاقوامی قوانین کی خلاف ورزی کرتے ہیں اور سویلنز سٹرکچرز کو جنگی ضرورتوں کے لیے استعمال کرتے ہیں۔
نصیرات میں وزارت صحت کےحکام کا کہنا ہے کہ کم از کم 16 فلسطینی ہفتے کے روز اس وقت جاں بحق ہو گئے تھے، جب اسرائیلی فوج نے 'اونروا' کے سکول پر بمباری کی۔
واضح رہے غزہ کی جنگ دسویں ماہ میں داخل ہو چکی ہے اور اس دوران کم از کم 38193 فلسطینی ہلاک اور 87903 زخمی ہو چکے ہیں۔
