طائف میں سٹرابیری چننا موسمِ گرما کی ایک میٹھی تفریح

طائف میں الہدا کے ناہموار پہاڑوں میں ایک سٹرابیری فارم سیاحوں کے لیے ایک مقبول مقام کے طور پر ابھرا ہے جہاں وہ گرمی کی شدت سے بچ کر اور شہری زندگی کی ہلچل سے ہٹ کر فطری حسن میں وقت گذار سکتے ہیں۔

عرب نیوز نے حال ہی میں الہدا اسٹرابیری فارم کا دورہ کیا تاکہ دیکھا جائے کہ یہ کس طرح خطے کی قدرتی خوبصورتی اور متحرک ثقافت کے جوہر کو اپنی گرفت میں لیے ہوئے ہے۔

الہدا کے سیاحتی علاقے میں بلند جگہ پر واقع سٹرابیری فارم سارا سال سیاحوں کا استقبال کرتا ہے۔ یہاں مہمانوں کو تازہ سٹرابیری چننے اور بطخ اور طوطوں جیسی جنگلی حیات کو قریبی آبشار کی پرسکون آواز میں دانہ کھلانے کے تفریحی مواقع میسر ہیں۔

پرندوں کے لیے ایک خوبصورت باغ اور بطخوں اور کچھوؤں کے لیے ایک جھیل کے ساتھ یہاں آئس کریم، گرم مشروبات اور سٹرابیری کا جوس فروخت کرنے والے سٹالز موجود ہیں۔ اس میں بیٹھنے کی جگہ اور ایک دیہی طرز کا چھوٹا سا گھر بھی ہے۔

فارم کے بانی ترکی الاحمدی نے عرب نیوز کو بتایا کہ انہوں نے فارم کو اس طرح سے ڈیزائن کیا جو اپریل سے جون تک فصل کاٹنے کے موسم کے بعد مہمانوں کو اپنی طرف متوجہ کرتا ہے۔ اس مقصد کے لیے فطری ماحول میں تفریح اور راحت فراہم کرنے کے لیے مختلف سہولیات نصب کی گئی ہیں۔

ان کے بیٹے بندر الاحمدی نے کہا، سٹرابیری چننے اور تازہ پھلوں سے لطف اندوز ہونے کے ساتھ ساتھ ان کا خاندان فارم کو ایک ایسی جگہ بنانے کا خواہاں ہے جہاں بالغ اور بچے مختلف قسم کے درختوں کے بارے میں جان سکیں۔

فارم میں انار، انجیر، سنگترے، سیب اور شہتوت سمیت درختوں کے نمونے رکھےگئے ہیں اور ساتھ ہی ان کے مسکن، آبپاشی کے طریقہ کار، کاشت کے مقامات اور عمر کے بارے میں دیگر اہم تفصیلات شامل ہیں۔

حامد الصبحی نے فارم کے حالیہ دورے کے دوران عرب نیوز سے بات کرتے ہوئے کہا، "الہدا میں سٹرابیری فارم کا دورہ کرنے والے کئی رشتہ داروں نے ہمیں بتایا کہ اگر وہ اسٹرابیری چننے کی سرگرمی میں حصہ نہ لیں تو ان کا طائف گورنری کا سفر مکمل نہیں ہو گا۔"

اپنے خاندان کے ساتھ مکہ سے آنے والے الصبحی کو فارم کی سہولیات نے متوجہ کیا: "فارم میں خود اپنی سٹرابیری چننا واقعی ایک چیز ہے۔ میرے بچے واقعی اس سے لطف اندوز ہوئے اور واقعی اتنے خنک موسم میں پہاڑ کی چوٹی پر رہنے سے ہمارا دورہ مزید خوشگوار ہو گیا ہے۔"

جدہ سے آنے والے عبدالمحسن القادی نے کہا کہ سٹرابیری چننے کا تجربہ ان کے اور ان کے خاندان کے لیے بہت تسکین بخش تھا۔

انہوں نے کہا، "یہ ایک لازمی سیر کا مقام ہے اور ایک دلکش نظارہ ہے۔ ہم اس فارم کا پہلی بار دورہ کر رہے ہیں اور اپنی سٹرابیری کو خود ہاتھ سے توڑنے سے لے کر پرندوں کے چھوٹے سے باغ اور بطخوں اور کچھوؤں کی جھیل میں دیگر سرگرمیوں تک ہم واقعی تمام چیزوں سے لطف اندوز ہوئے۔ مقامی ثقافت اور ورثے کے بارے میں سیکھنے کے ساتھ ساتھ علاقے کی خوبصورتی سے لطف اندوز ہونے کا یہ ایک بہترین طریقہ ہے۔"

الہدا فارم میں داخلے کی فیس 35 سعودی ریال (نو ڈالر) ہے۔ اسٹرابیری کے فارم ابہا، حیل اور قطیف میں بھی مل سکتے ہیں۔