سعودی عرب کی جازان یونیورسٹی میں طالبات کے ایک گروپ نے ’’ کبسہ‘‘ گیم پروجیکٹ پیش کردیا۔ اس گیم میں روایتی پکوانوں کے ذریعے سعودی عرب کی ثقافت کی نمائندگی کی گئی ہے۔ یہ کھیل صرف ایک تفریحی تجربہ نہیں ہے بلکہ ایک انٹرایکٹو سفر ہے جو کھلاڑیوں کو سعودی عرب کی دولت اور تنوع کو دیکھنے کے دورے پر لے جاتا ہے۔
اگرچہ "کبسہ" ابھی بھی ڈیزائن کے مرحلے میں ہے اور ڈرائنگ اور آئیڈیاز شکل اختیار کر رہے ہیں تاہم طالبات کے جذبے اور تخلیقی صلاحیتوں کا مقصد اسے ایک مربوط اور بااثر تجربہ میں تبدیل کرنا ہے۔ سعودی طالبات کے اس پراجیکٹ کو انٹرپرینیورشپ فورم میں بہت پذیرائی ملی اور انہوں نے اس حوالے سے مقابلے میں چوتھی پوزیشن حاصل کرلی۔ شاندار پریزنٹیشن اور جدید ڈیزائنز نے ان کی کامیابی میں اہم کردار ادا کیا۔
گیم آئیڈیا
جن طالبات نے پراجیکٹ پیش کیا ان میں رزان عتين، مها مرعي، منار خرمی، مجد المسعودی، وهديل العامری، ورهف قحطانی شامل ہیں۔ طالبہ رزان نے ’’ العربیہ ڈاٹ نیٹ ‘‘ کو کبسہ گیم ڈیزائن کرنے کے پیچھے بنیادی خیال کے بارے میں بتایا اور کہا کہ یہ گیم سعودی ورثے کی عکاسی کرتا ہے۔ انہوں نے کہا یہ آئیڈیا ہمارے ورثے کے جذبے اور جدید ٹیکنالوجی کے استعمال سے تعلیم اور تفریح کو یکجا کرنے کی ہماری خواہش کی بنیاد پر ہے۔ ہم ایک ایسا کھیل ڈیزائن کرنا چاہتے تھے جو روایتی ورثے اور ہر علاقے کے روایتی کھانے پر مرکوز ہو۔ ہم چاہتے تھے کہ ہماری ثقافت کی خوبصورتی کو تفریحی انداز میں اجاگر کیا جائے۔ یہ ایک الیکٹرانک سیاحت ہے۔ کبسہ کا مطلب صرف ایک کھانا نہیں ہے بلکہ یہ پکوانوں کی ایک متنوع دنیا میں داخل ہونے کا راستہ ہے جو ہر علاقے کے ورثے کی نمائندگی کرتا ہے۔
پکوان کا انتخاب
انہوں نے وضاحت کی کہ پکوانوں کا انتخاب آرٹس اینڈ کلنری اتھارٹی کی ثقافتی لائبریری پر مبنی محتاط تحقیق کی بنیاد پر کیا گیا تھا ۔ ہر ڈش خطے کی شناخت اور اس کی مخصوص روایات کی عکاسی کرتی ہے جس سے کھلاڑی سعودی ورثے کی دولت اور تنوع کو دریافت کرتے ہیں۔
انہوں نے کہا کہ سب سے نمایاں چیلنجوں میں سے ایک چیلنج تعلیم اور تفریح کے درمیان توازن تلاش کرنا تھا۔ ایک سادہ اور پرکشش ڈیزائن فراہم کرنا تھا جو تمام عمر کے گروپوں کے لیے موزوں ہو۔ اس گیم کو ابھی تک اس کے مکمل ورژن میں لانچ نہیں کیا گیا ہے۔ یہ ابھی اپنے ابتدائی مراحل میں ہے۔
ثقافتی بیداری کا فروغ
رزان نے وضاحت کی کہ کبسہ گیم ایک انٹرایکٹو تجربہ فراہم کرتی ہے جو کھلاڑیوں کو ہر علاقے کے روایتی پکوانوں سے ایک تفریحی اور اختراعی انداز میں متعارف کراتی ہے۔ یہ گیم ثقافتی بیداری کو فروغ دینے میں کردار ادا کرے گی۔
گیم کی خصوصیات
اپنی طرف سے جازان یونیورسٹی کے کالج آف انجینئرنگ اینڈ کمپیوٹر سائنس کے ڈین موسیٰ بن محمد خبرانی نے ’’العربیہ ڈاٹ نیٹ‘‘ کو بتایا ہے کہ "کبسہ" گیم کو جو چیز ممتاز کرتی ہے وہ سعودی ثقافتی ورثے کے ساتھ جدید ٹیکنالوجی کا استعمال کرتے ہوئے تعامل کو جوڑنے کی صلاحیت ہے۔ یہ گیم روایتی پکوانوں کا جائزہ لے کر ایک پرلطف تعلیمی تجربہ فراہم کرتی ہے جو حقیقت کی نقالی کرتی ہے۔ گیم صارفین کو سعودی ثقافت کے بارے میں ایک سادہ اور دلچسپ انداز میں جاننے کا موقع فراہم کرتی ہے ۔ یہ گیم ہر عمر کے گروپوں کے لیے موزوں ہے۔
