غزہ پر اسرائیلی حملوں میں گذشتہ 48 گھنٹوں میں 90 سے زائد افراد ہلاک: وزارت صحت
غزہ کی وزارتِ صحت نے ہفتے کے روز کہا کہ غزہ میں اسرائیلی حملوں میں گذشتہ 48 گھنٹوں کے دوران 90 سے زائد افراد ہلاک ہو چکے ہیں اور اسرائیلی قیدیوں کی رہائی اور غیر مسلح کرنے کی غرض سے حماس پر دباؤ ڈالنے کے لیے اسرائیلی فوجیوں نے حملوں میں اضافہ کر دیا۔
ہسپتال کے عملے کے مطابق ہلاک شدگان میں 15 افراد شامل ہیں جو راتوں رات ہلاک ہو گئے۔ ان میں خواتین اور بچوں سمیت بعض ایک مخصوص انسانی زون میں پناہ گزین تھے۔
ہسپتال کے کارکن نے بتایا کہ جنوبی شہر خان یونس میں کم از کم 11 افراد ہلاک ہوئے جن میں سے متعدد مواصی کے علاقے میں ایک خیمے میں پناہ گزین تھے جہاں لاکھوں بے گھر لوگ رہ رہے ہیں۔ اسرائیل نے اسے انسانی علاقہ قرار دیا ہوا ہے۔
یورپیئن ہسپتال جہاں لاشیں لائی گئی تھیں، کے مطابق رفح شہر میں الگ الگ حملوں میں چار دیگر افراد ہلاک ہو گئے جن میں ایک ماں اور اس کی بیٹی بھی شامل ہیں۔
یہ حملے ایسے وقت میں ہوئے ہیں جب امدادی گروپوں نے اسرائیل کی جانب سے غزہ کی ناکہ بندی پر خطرے کی گھنٹی بجا دی ہے۔ یہاں اسرائیل نے چھے ہفتوں سے زائد عرصے سے خوراک اور دیگر تمام اشیاء کے داخلے پر پابندی عائد کر رکھی ہے۔ اقوامِ متحدہ نے کہا ہے کہ ہزاروں بچے غذائی قلت کا شکار ہیں اور غذائی ذخائر میں کمی کے باعث زیادہ تر لوگ روزانہ بمشکل ایک وقت کا کھانا کھا رہے ہیں۔
غزہ کی وزارتِ صحت کے مطابق اسرائیل کے مظالم میں اب تک 51,000 فلسطینی ہلاک ہو چکے ہیں۔ لاکھوں لوگ خیمہ کیمپوں اور بمباری سے تباہ شدہ عمارات میں مقیم ہیں۔
