سعودی عرب : 2.5 لاکھ کے قریب منشیات کی گولیوں کی اسمگلنگ کی کوششیں ناکام

سعودی عرب کی کسٹمز اتھارٹی نے نشہ آور مادہ "ایمفیٹامین" کی اسمگلنگ کی متعدد کوششیں ناکام بنا دیں، جن کے دوران مجموعی طور پر 2,42,296 گولیاں برآمد کی گئیں۔ یہ گولیاں مختلف ٹرکوں اور گاڑیوں میں چھپا کر سعودی عرب لانے کی کوشش کی گئی تھی، اور یہ کوششیں الربع الخالی، الحدیثہ اور الدرّة کے سرحدی راستوں پر ناکام بنائی گئیں۔

تفصیلات کے مطابق، "زکاة، ٹیکس و کسٹمز اتھارٹی" کے ترجمان حمود الحربی نے بتایا کہ پہلی کوشش میں الربع الخالی کے راستے پر ایک ٹرک کے مختلف حصوں میں چھپائی گئی 2,02,570 گولیاں برآمد کی گئیں۔ الحدیثہ سرحدی راستے پر تین کوششیں ناکام بنائی گئیں، ان میں پہلی میں 9,859 گولیاں ٹرک میں بنائے گئے خفیہ خانوں میں چھپائی گئی تھیں، دوسری میں 6,040 گولیاں ایک "الیکٹرک وائرنگ" کے سامان میں چھپائی گئی تھیں، اور تیسری میں 11,424 گولیاں ایک گاڑی کے "ڈرائیو شافٹ" کے اندر چھپائی گئی تھیں۔ چوتھی کوشش منفذ الدرّة پر ناکام بنائی گئی، جہاں ایک گاڑی کے "ڈرائیور شافٹ" میں چھپائی گئی 12,403 گولیاں برآمد ہوئیں۔

الحربی کے مطابق، ضبطی کی کارروائی مکمل ہونے کے بعد جنرل ڈائریکٹوریٹ آف نارکوٹکس کنٹرول سے رابطہ کیا گیا، جس کے نتیجے میں مملکت کے اندر منشیات وصول کرنے والے دو افراد کو گرفتار کیا گیا۔

ترجمان نے زور دیا کہ اتھارٹی مملکت کی درآمدات اور برآمدات پر مکمل نگرانی جاری رکھے ہوئے ہے تاکہ معاشرے کو منشیات جیسے خطرناک زہر سے محفوظ رکھا جا سکے، اور یہ کام انسدادِ منشیات کے ادارے سے مسلسل تعاون کے ذریعے انجام دیا جا رہا ہے۔

انھوں نے عوام سے اپیل کی کہ وہ اسمگلنگ کے خلاف قومی مہم میں شامل ہوں اور کسی بھی مشکوک حرکت یا جرم کی اطلاع اتھارٹی کے سیکیورٹی ہیلپ لائن 1910، یا ای میل ([email protected]) یا بین الاقوامی نمبر (009661910) پر دیں۔ ترجمان نے یقین دہانی کرائی کہ تمام اطلاعات کو مکمل رازداری کے ساتھ نمٹایا جائے گا، اور مصدقہ اطلاع دینے والوں کو مالی انعام بھی دیا جائے گا.