سعودی عرب کی وزارت حج و عمرہ نے مسجد نبوی میں زائرین کی آمد و رفت کو مزید سہل بنانے کے لیے ایک اہم اقدام کے تحت وہیل چیئرز کی سہولت فراہم کر دی ہے۔ یہ خدمت مسجد کے اندر نقل و حرکت کو آسان بنانے اور زائرین کو زیادہ سے زیادہ آرام پہنچانے کی غرض سے فراہم کی گئی ہے۔
یہ سہولت مسجد نبوی کے بارہ مخصوص دروازوں پر دستیاب ہے، جن میں باب السلام، باب البقیع، باب الجنائز، باب قباء، باب ملک فہد، باب جبریل، باب الصدیق، باب النساء، باب الرحمت، باب الحجرہ، باب ملک عبدالعزیز اور باب ملک سعود شامل ہیں۔ ان دروازوں کا انتخاب زائرین کی آسان رسائی کو مد نظر رکھ کر کیا گیا ہے۔
وزارت کا کہنا ہے کہ یہ قدم خاص طور پر بزرگوں اور معذور افراد کی ضروریات کو مدنظر رکھتے ہوئے اٹھایا گیا ہے، تاکہ وہ بآسانی اپنی عبادات انجام دے سکیں۔ اس اقدام کے تحت ایک مربوط انتظامی ماحول فراہم کیا گیا ہے جو مسجد نبوی کے اندر آزادانہ اور سہل نقل و حرکت کو یقینی بناتا ہے۔
