ایران سے حزب اللہ کو ہتھیاروں کی فراہمی تباہ، لبنانی فوج کی حمایت کریں: پومپیو

سی آئی اے کے سابق سربراہ اور ٹرمپ کی سابق انتظامیہ کے اعلیٰ امریکی سفارت کار نے بیروت کو ایران کی طرف سے ہتھیاروں کی فراہمی کا راستہ مکمل تباہ کرنے پر زور دیتے ہوئے لبنان اور اس کی فوج کے لیے امریکی حمایت میں اضافے کا مطالبہ کیا۔

سابق امریکی وزیرِ خارجہ مائیک پومپیو نے کہا، "لبنان ایک دوراہے پر کھڑا ہے۔"

انہوں نے فاکس نیوز کے لیے اپنی رائے پر مبنی ایک کالم میں لکھا، "کئی عشروں کے منفی ایرانی اثر و رسوخ اور ملک پر حزب اللہ کے تسلط کے بعد صدر ڈونلڈ ٹرمپ کے پاس ایک تاریخی موقع ہے کہ وہ اہم امریکی مفادات میں پیش رفت کرتے ہوئے لبنانی عوام کو ان کی قوم پر دوبارہ حق حاصل کرنے میں مدد کریں۔"

لبنانی حکومت نے حال ہی میں ایرانی حمایت یافتہ گروپ حزب اللہ کی شدید مخالفت کے باوجود اسے اور ملک میں موجود دیگر تمام غیر ریاستی گروپوں کو غیر مسلح کرنے کا منصوبہ اختیار کیا۔

یہ فیصلہ اسرائیل کے حزب اللہ کو فوجی شکستِ فاش دینے کے بعد سامنے آیا جب مؤخر الذکر نے حماس کی حمایت میں اسرائیل پر راکٹ داغنا شروع کر دیئے تھے۔

لبنانی مسلح افواج (ایل اے ایف) نے سست روی سے لیکن مستحکم پیش رفت کی ہے۔ امریکی حکام اور لبنانی حکومت کے مطابق بھی اس سلسلے میں مزید کام کرنے کی ضرورت ہے۔

پومپیو نے کہا، "ہمیں اپنے دوستوں اور اتحادیوں کے ساتھ مل کر کام کرنا چاہیے تاکہ ایران کی لبنان میں ہتھیاروں کی فراہمی کو منظم طریقے سے تباہ کیا جا سکے۔ ہر راکٹ، ہر میزائل، ہر ایک فوجی ساز و سامان جو ایران لبنان میں منتقل کرتا ہے، اسے شناخت اور ختم کیا جائے۔"

ایک اور اختلافی نکتہ اقوامِ متحدہ کی امن فوج (یونی فِل) کی لبنان میں تعیناتی ہے جس کی سلامتی کونسل نے تجدید کرنا تھی۔ اس پر ووٹنگ تاخیر کا شکار ہے اور واشنگٹن اس مینڈیٹ کو ہمیشہ کے لیے ختم کر دینا چاہتا ہے۔

پومپیو نے کہا، یونی فِل کا "ناکام مشن ختم ہونا چاہیے۔ اس کے مینڈیٹ کے صرف چند ہفتے باقی رہ گئے ہیں، اب وقت آگیا ہے کہ اقوامِ متحدہ کا یہ غیر ضروری اور بے فائدہ منصوبہ ختم کر دیا جائے۔"

اگرچہ پومپیو نے بین الاقوامی برادری کے برسوں تک لبنان کے مسائل بشمول ایک تباہ شدہ مرکزی بینک اور بدعنوان ریاستی ادارے پر بحث کرنے کا ذکر کیا لیکن انھوں نے کہا کہ حزب اللہ کی مسلح موجودگی ہمیشہ ایک رکاوٹ رہے گی۔

پومپیو نے کہا، "لبنان میں دو افواج نہیں ہو سکتیں۔ ایسا نہیں ہو سکتا کہ ایک گروپ جو تہران کو جواب دہ ہو لیکن بیروت کی خدمت کرنے کا بھی دعویٰ کرے۔ لبنان کا دفاع کرنے کی صلاحیت رکھنے والی صرف ایک ہی قانونی طاقت ہو سکتی ہے: لبنانی مسلح افواج۔"

انہوں نے مزید کہا، "امریکہ کو لبنانی مسلح افواج (ایل اے ایف) کی بھی حمایت کرنی چاہیے۔ ایل اے ایف ایک متحد اور جائز حکمرانی کے لیے لبنان کی بہترین امید کی نمائندہ ہے۔ ہمیں ان کو انٹیلی جنس کے اشتراک، جدید ہارڈ ویئر، قیادت کی جامع تربیت اور دیگر ضروری معاونت سمیت ہر ضروری چیز فراہم کرنی چاہیے۔"