شام کے صدر احمد الشرع نے پیر کو سعودی عرب کی طرف سے ملنے والے تحفے کو عوام کے سامنے مسجد اموی میں نمائش کے لیے پیش کر دیا۔ یاد رہے 8 دسمبر کو شام میں سابق صدر بشار الاسد کی معزولی کی پہلی برسی منائی جا رہی ہے۔
بڑی تعداد میں موجود حامیوں کے حصار میں الشرع نے انکشاف کیا کہ سعودی عرب کے ولی عہد شہزادہ محمد بن سلمان نے انہیں کسوۃ الکعبہ تحفے میں دیا تھا۔
قرآنی آیت کی کشیدہ کاری والا یہ پارچہ اب نمائش کے لیے دِمشق کی اموی مسجد میں رکھا گیا ہے۔
نمازیوں سے خطاب کرتے ہوئے شامی صدر نے کہا کہ بیرونِ ملک انہوں نے اولین سرکاری دورہ فروری میں سعودی عرب کا کیا تھا جہاں انہوں نے محمد بن سلمان سے ملاقات کے علاوہ عمرہ بھی ادا کیا۔
الشرع نے کہا، "(عمرہ کی ادائیگی سے) ہماری واپسی پر شہزادہ محمد بن سلمان نے ہمیں تحفہ دیا - کسوۃ الکعبہ"۔
انہوں نے مزید کہا، "ہم نے ترجیح دی کہ یہ پارچہ اموی مسجد میں رکھا جائے جو اقوام کو متحد کرنے اور مکہ سے سرزمینِ شام تک محبت و اخوت کے رشتوں کو وسعت دینے کے لیے نہایت اہمیت کی حامل ہے۔ ہم نے اس کے افتتاح کے لیے اپنی فتح کی سالگرہ کے بالکل ابتدائی لمحات کا انتخاب کیا۔"
