سعودی مملکت کی اے آئی کمپنی ہیومین کے سربراہ طارق امین کے مطابق واشنگٹن اور ریاض کے درمیان نئے سودوں کے بعد جدید ترین این ویڈیا چپس سعودی عرب پہنچ گئی ہیں۔
"جدید ترین مستقبل آفریں این ویڈیا اے آئی جی پی یو چپس پہنچ گئی ہیں جس کی بنیاد گذشتہ سال Groq کی کامیاب ترسیل نے رکھی۔ ٹیم کی پوری توجہ تیزی سے تیاری پر مرکوز ہو گی تاکہ یہ بات یقینی بنائی جائے کہ سالِ نو کے آغاز سے پہلے سب کچھ تیار اور فعال ہو،" امین نے ایکس پر ایک پوسٹ میں کہا۔
انہوں نے انتہائی مطلوب چپس کے ڈبوں کی تصاویر پوسٹ کیں اور لکھا: "ایسی تیزی اتفاقاً نہیں ہوتی۔"
نیز کہا، "یہ بات ہمارے عزائم، عمل درآمد، اور اے آئی میں عالمی معیار کے وسعت پذیر بنیادی ڈھانچے کی تعمیر کے واضح عہد کی عکاس ہے۔ آئندہ وقت پرجوش ہو گا۔"
ہیومین آئندہ مہینوں میں امریکہ سے درآمد شدہ سیمی کنڈکٹرز کا استعمال کرتے ہوئے سعودی عرب میں اپنا پہلا ڈیٹا سینٹرز شروع کرنے کی تیاری کر رہا ہے۔
امین نے پہلے اس خواہش کا اظہار کیا تھا کہ امریکہ اور چین کے بعد سعودی عرب دنیا میں اے آئی انفراسٹرکچر کا تیسرا بڑا فراہم کنندہ بن جائے۔
ہیومین اور امریکہ میں مقیم Qualcomm Technologies نے اکتوبر میں ایک تاریخی معاہدے کا بھی اعلان کیا جس کا مقصد سعودی مملکت کو اے آئی کے عالمی مرکز کا مقام دلوانا ہے۔ یہ معاہدہ عالمی سطح پر اے آئی انفرینسنگ سروسز فراہم کرنے کی غرض سے ہوا ہے۔ اس پروگرام کے تحت ہیومین کا مقصد ہے کہ 2026 سے شروع ہونے والے 200 میگا واٹ کوالکوم AI200 اور AI250 ریک سلوشنز فراہم کرنا ہے جو سعودی عرب میں اور بین الاقوامی سطح پر بھی اعلیٰ کارکردگی والی اے آئی انفرینس سروسز پیش کریں۔
