حزب اللہ کااسلحہ محدود کرنے کا منصوبہ،لبنانی فوج کا پہلے مرحلے کے اہداف حاصل کرنے کااعلان
فوج نے اپنے بیان میں کہا ہے کہ دریائے لیطانی کے جنوب میں کارروائیاں ابھی جاری ہیں
لبنانی فوج نے تصدیق کی ہے کہ اسلحے کو ریاست تک محدود کرنے سے متعلق اس کا منصوبہ پیش رفت کے مرحلے میں داخل ہو چکا ہے کیونکہ پہلے مرحلے کے اہداف زمینی سطح پر مؤثر اور واضح انداز میں حاصل کر لیے گئے ہیں۔ اس مرحلے کی توجہ فوج کی عملی موجودگی کو وسعت دینے، اہم علاقوں کو محفوظ بنانے اور دریائے لیطانی کے جنوب میں واقع اس شعبے میں ان علاقوں پر عملی کنٹرول قائم کرنے پر مرکوز رہی جو لبنانی فوج کے اختیار میں آ چکے ہیں، “سوائے ان زمینوں اور مقامات کے جو اب بھی اسرائیلی قبضے میں ہیں”۔
لبنانی فوج نے اپنے بیان میں کہا کہ اس شعبے میں کارروائیاں اس وقت تک جاری رہیں گی جب تک نہ پھٹنے والا گولہ بارود اور سرنگوں کی مکمل صفائی نہیں ہو جاتی۔ اس کے علاوہ کنٹرول کو مضبوط بنانے کے لیے درکار اقدامات کی درخواستوں پر بھی عمل کیا جا رہا ہے، تاکہ مسلح گروہوں کو اپنی صلاحیتیں دوبارہ تعمیر کرنے سے مستقل طور پر روکا جا سکے۔
فوجی قیادت نے اعلان کیا کہ وہ “ہوم لینڈ شیلڈ” منصوبے کے پہلے مرحلے کا ایک جامع اور مکمل جائزہ لے رہی ہے، جس کی بنیاد پر آئندہ مراحل کے راستے کا تعین کیا جائے گا۔
فوجی قیادت کے شعبہ رہنمائی نے بتایا کہ 5 اگست 2025 کو لبنانی کابینہ کے جاری کردہ فیصلے پر عمل درآمد کے تحت، لبنانی فوج دیگر سیکیورٹی اداروں کے ساتھ مل کر ملک میں امن و استحکام برقرار رکھنے کی واحد ذمہ داری سنبھالنے کے اپنے مکمل عزم کی توثیق کرتی ہے، بالخصوص دریائے لیطانی کے جنوب میں واقع علاقے میں۔ یہ اقدام لبنانی آئین، نافذ العمل قوانین و ضوابط، سیاسی قیادت کے فیصلوں اور متعلقہ بین الاقوامی قراردادوں کے تحت عائد ذمہ داریوں کی تکمیل کے لیے کیا جا رہا ہے، تاکہ جنوبی سرحدوں پر امن و استحکام بحال ہو سکے اور انہیں کسی بھی فوجی کارروائی کے لیے مستقل طور پر استعمال ہونے سے روکا جا سکے۔ یہ سب اس ریاستی فیصلے کے دائرے میں آتا ہے جس کے تحت لبنانی ریاست اپنی خود کی قوتوں کے ذریعے پورے لبنانی علاقے پر اپنی عمل داری قائم کرے گی۔
اسی تناظر میں لبنانی فوج نے اس امر کی نشان دہی کی کہ لبنانی سرزمین پر اسرائیلی حملوں کا تسلسل، اندرون ملک متعدد مقامات پر قبضہ، بعض علاقوں تک رسائی محدود کرنے کے لیے عارضی زونز کا قیام، اور 27 نومبر 2024 کو جاری جنگ بندی کے معاہدے کی روزانہ بنیادوں پر مسلسل خلاف ورزیاں، یہ تمام عوامل مطلوبہ مشن کی تکمیل پر منفی اثر ڈال رہے ہیں، خاص طور پر ان علاقوں کے قرب و جوار میں۔ اس کے نتیجے میں ریاستِ لبنان کی عمل داری قائم کرنے اور بغیر کسی استثنا کے اسلحہ صرف اس کی مسلح افواج تک محدود رکھنے کے عمل میں رکاوٹ پیدا ہو رہی ہے۔
