وزن گھٹائیں اور سونا پائیں: مصری حکومت کی مہم سے شہریوں میں جوش و خروش

ہر سال رمضان المبارک کا مہینہ آتے ہی ٹی وی اسکرینز ڈرامہ پروڈکشن کمپنیوں کے درمیان ایک جنونی مقابلے کا منظر پیش کرتی ہیں اور بڑے برانڈز اپنے اشتہارات کے ذریعے ایک دوسرے پر سبقت لے جانے کی کوشش کرتے ہیں۔

لیکن مصر میں رواں سال کا رمضان محض ڈرامائی مقابلے کا میدان نہیں رہا بلکہ اس بار ایک مختلف کھلاڑی میدان میں اترا ہے جس نے سفید کوٹ پہن رکھا ہے اور جس کے ہاتھ میں کیمرے کے بجائے وزن کرنے والی مشین ہے۔

مصری وزارت صحت نے اس مقدس مہینے کو صحت مند عادات کو فروغ دینے کا سیزن بنانے کا فیصلہ کیا ہے اور اس مقصد کے لیے انتہائی دلچسپ اور پرکشش انداز میں آگاہی مہم کے اشتہارات جاری کیے ہیں۔

وزن گھٹانے پر سونے کا انعام

وزارت صحت نے وزن کم کرنے کی ایک غیر روایتی مہم شروع کی ہے جس میں لکی ڈرا کے ذریعے ان لوگوں کے لیے سونے کے 6 سکوں یا 6 ہزار پاؤنڈ کے انعامات کا وعدہ کیا گیا ہے جو رمضان کے دوران اپنا 6 کلو گرام وزن کم کرنے میں کامیاب ہوں گے۔

اس سادہ اور دلکش خیال کے ذریعے وزارت نے رمضان کو قطائف، کنافہ اور میٹھے مشروبات کے بوجھ تلے وزن بڑھانے کے بجائے فٹنس کی واپسی کا ایک سنہرا موقع بنا دیا ہے۔

اس مہم کو صرف نعروں تک محدود نہیں رکھا گیا بلکہ وزارت نے تمام گورنریوں کی گلیوں، میٹرو اسٹیشنوں اور دیگر عوامی مقامات پر رجسٹریشن اور وزن کرنے کے لیے مخصوص مراکز کے قیام کا اعلان بھی کیا ہے۔ یہ ایک ایسا منظر ہے جہاں صحت عامہ اور سماجی تحرک ایک دوسرے میں گھل مل گئے ہیں اور اب وزن کرنے والی مشین گھر کے کسی کونے میں پڑی خاموش چیز نہیں بلکہ ایک قومی اقدام کی ہیرو بن چکی ہے۔

’آپ ہی حل ہیں‘: فرد کی ذمہ داری

وزن کم کرنے کی یہ مہم ’آپ ہی حل ہیں‘ نامی ایک وسیع تر مہم کے تحت چلائی جا رہی ہے جسے وزارت صحت نے رمضان کے دوران صحت عامہ کی بہتری کے لیے شروع کیا ہے۔ وزارت اس مہم کے ذریعے روزانہ کی بنیاد پر پیغامات نشر کر رہی ہے جن میں افطار کے وقت اعتدال سے کھانے، خوراک کو حصوں میں تقسیم کرنے، بدہضمی سے بچنے، پانی اور صحت بخش مشروبات کا کثرت سے استعمال کرنے اور شکر سے بھرپور روایتی مٹھائیوں سے پرہیز کرنے جیسے تصورات کو عام کیا جا رہا ہے۔ اس کے ساتھ ہی افطار کے بعد تھوڑی دیر پیدل چلنے کی عادت ڈالنے پر بھی زور دیا جا رہا ہے۔

اس مہم کی سب سے نمایاں بات یہ ہے کہ اس نے شہری کو محض ایک سہولت حاصل کرنے والے کے بجائے ایک شراکت دار کے طور پر مخاطب کیا اور پیغام دیا کہ ’آپ ہی حل ہیں‘۔

کئی برسوں سے رمضان کا تصور بھرپور دسترخوانوں، لمبی نشستوں اور سستی سے جڑا رہا ہے جس کے نتیجے میں مہینے کے آخر میں پچھتاوے اور ڈائیٹنگ کی ناکام کوششوں کا آغاز ہوتا تھا۔

لیکن ایسا لگتا ہے کہ اس سال وزارت نے اسکرپٹ بدلنے کا فیصلہ کر لیا ہے۔ اب ڈرامہ صرف اسکرین پر نہیں بلکہ ہر گھر میں خاموشی سے ایک اور ڈرامہ چل رہا ہے:

کیا میں 6 کلو وزن کم کر سکوں گا اور کیا سونا جیت پاؤں گا؟

اس مہم کی ذہانت اس بات میں پوشیدہ ہے کہ اس نے صحت کے حوالے سے ترغیب اور مادی کشش کو یکجا کر دیا ہے۔ یہاں سونا محض ایک انعام نہیں بلکہ خود صحت کی قدر و قیمت کی علامت ہے۔

وزن اور آگاہی کے درمیان

اگرچہ کچھ لوگ ایک مہینے میں 6 کلو وزن کم کرنے کی حقیقت پسندی یا انعامات کے ذریعے صحت مند رویوں میں تبدیلی کے فائدے پر اختلاف کر سکتے ہیں، لیکن یہ مہم بحث چھیڑنے اور موٹاپے کے مسئلے کو رمضان کی گفتگو کا حصہ بنانے میں کامیاب رہی ہے۔

شاید اس سال سب سے خوبصورت بات یہ ہے کہ سونا اب صرف سنار کی دکانوں میں نہیں بلکہ وزن کرنے والی مشین کے پلڑے میں ہے اور اب مقابلہ ڈراموں کے اداکاروں کے درمیان نہیں بلکہ ہر انسان کا اپنی ذات سے ہے تاکہ وہ بہتر صحت حاصل کر سکے۔