ایران کو ہر گز اجازت نہیں دیں گے کہ وہ بُرے معاہدے کے لیے ہم پر دباؤ ڈالے: روبیو

امریکی وزیر خارجہ مارکو روبیو نے اس بات پر زور دیا ہے کہ امریکی صدر ڈونلڈ ٹرمپ ایرانیوں کو اس بات کی اجازت نہیں دیں گے کہ وہ برا معاہدہ کرنے کے لیے ان پر دباؤ ڈالنے کی خاطر داخلی سیاست کا استعمال کریں۔

روبیو نے گزشتہ روز جمعرات کو کہا "میرا خیال ہے کہ صدر جو بات واضح کر رہے ہیں وہ یہ ہے کہ اگر ایرانی یہ سمجھتے ہیں کہ وہ ایک برے معاہدے کے لیے ان پر دباؤ ڈالنے کی خاطر ہماری داخلی پالیسیوں کو استعمال کرنے میں کامیاب ہو جائیں گے، تو ایسا نہیں ہو گا"۔

امریکی وزیر خارجہ نے امریکیوں پر آبنائے ہرمز کی بندش کے اثرات کم کرنے کے لیے غیر معمولی اقدامات کرنے کا ذکر کرتے ہوئے کہا "ہم نے پیٹرول کی قیمتوں کو دنیا کے بعض دیگر حصوں کے مقابلے میں کم رکھنے کے لیے غیر معمولی اقدامات کیے ہیں۔ اور یہ قیمتیں مزید کم ہوں گی۔ وہ آبنائے کھلی رہے گی اور ہم ان قیمتوں میں کمی دیکھیں گے"۔

روبیو نے اس بات پر زور دیا کہ ایران کا جوہری ہتھیار حاصل کرنا اسے آبنائے ہرمز پر مستقل کنٹرول کے قابل بنا دے گا۔ انہوں نے کہا "میں یہ بھی کہتا ہوں کہ جوہری ایران کی ایک قیمت ہے۔ اگر ایران نے کسی دن جوہری ہتھیار حاصل کر لیا.. تو پھر اسے آبنائے پر قبضہ کرنے سے کون روکے گا؟ اور اس وقت یہ بھول جائیں کہ یہ مسئلہ صرف تین یا چھ ماہ کا ہوگا۔ یہ ایک مستقل مسئلہ بن سکتا ہے"۔

روبیو نے کل انکشاف کیا تھا کہ ٹرمپ نے چینی صدر شی جن پنگ کے ساتھ بیجنگ میں دو گھنٹے سے زائد جاری رہنے والی سربراہی ملاقات کے دوران ایران کے ساتھ جاری جنگ اور آبنائے ہرمز کی بندش سے وابستہ تناؤ پر تبادلہ خیال کیا ہے۔ انہوں نے اس بات کی تصدیق کی کہ امریکہ نے تہران سے نمٹنے کے لیے چین سے کوئی مدد نہیں مانگی۔

روبیو نے جمعرات کو "این بی سی" نیٹ ورک کو دیے گئے ایک انٹرویو میں کہا کہ چینی فریق نے آبنائے ہرمز کو عسکری رنگ دینے یا وہاں جہاز رانی پر ٹرانزٹ فیس عائد کرنے کی مخالفت کی ہے اور یہ موقف امریکی وژن کے عین مطابق ہے۔

امریکی وزیر خارجہ نے اس بات پر زور دیا کہ واشنگٹن نے "چین سے کچھ نہیں مانگا"۔ انہوں نے مزید کہا "ہمیں ان کی مدد کی ضرورت نہیں ہے"۔ اگرچہ روبیو نے اس بات کا اعتراف کیا کہ عالمی سطح پر تیل کی قیمتوں میں اضافہ امریکی معیشت کو متاثر کر رہا ہے جیسا کہ یہ دیگر ممالک کو زیادہ بڑے پیمانے پر متاثر کرتا ہے۔