سپاہِ پاسدارانِ انقلابِ ایران نے کہا ہے کہ اسرائیل پر میزائلوں کی لہر ایک ہفتے تک جاری رہ سکتی ہے۔بیان میں کہا گیا کہ اسرائیل پر یہ حملہ ایک تنبیہ تھا اور اگر دوبارہ جارحیت کی گئی تو اس کا جواب زیادہ وسیع ہوگا، جس میں خطے میں موجود تمام امریکی اور اسرائیلی اہداف کو نشانہ بنایا جا سکتا ہے۔
ایرانی مسلح افواج کی قیادت نے اتوار کو کہا کہ اسرائیل نے جنوبی بیروت کے مضافاتی علاقے پر حملہ کر کے تمام سرخ لکیریں عبور کر لی ہیں۔مزید زور دیا کہ لبنان پر اسرائیلی حملے فوری طور پر روکے جائیں۔
ہیڈکوارٹر ''خاتم الانبیاء ''کے کمانڈر اور مسلح افواج کے مرکزی آپریشنل کمانڈر علی عبد اللہ علی آبادی نے کہا کہ اسرائیلی فوج کو جنوبی لبنان اور جنوبی بیروت پر حملے روکنے چاہییں، اگر اس نے کارروائیاں بڑھائیں یا ایران کے ردعمل کا جواب دیا تو اسے زیادہ تباہ کن حملوں کا سامنا کرنا پڑے گا۔
تاہم انہوں نے ایران کی جانب سے داغے گئے میزائلوں کا براہِ راست ذکر نہیں کیا، جنہیں اسرائیل نے مار گرانے کا دعویٰ کیا ہے۔
اسرائیل نے دعویٰ کیا ہے کہ ایران نے اس کی طرف میزائل فائر کیے ہیں، جو اپریل کے آغاز میں نازک جنگ بندی کے بعد پہلی براہِ راست کارروائی ہے، جس سے جنگ کے خاتمے کے لیے جاری سفارتی کوششیں مزید پیچیدہ ہو گئی ہیں۔
تہران نے اس سے قبل خبردار کیا تھا کہ اگر اسرائیل نے جنوبی بیروت پر حملے کیے تو وہ جوابی کارروائی کرے گا، اور اس نے امریکا کی جانب سے حالیہ دنوں میں دی گئی کشیدگی کم کرنے کی درخواست کو بھی نظر انداز کیا۔
اسرائیل کا کہنا ہے کہ اس کی کارروائیاں جنوبی بیروت میں اس کے مطابق اس لیے کی گئیں کیونکہ حزب اللہ، جو ایران کی حمایت یافتہ ہے، نے اسی روز شمالی اسرائیل پر فائرنگ کی تھی۔
بیروت پر اسرائیلی حملے اس معاہدے کے چند روز بعد ہوئے ہیں ،جو لبنان اور اسرائیل کی حکومتوں کے درمیان امریکا کی میزبانی میں ہونے والے مذاکرات کے دوران طے پایا تھا، تاہم حزب اللہ نے اس معاہدے کو مسترد کر دیا تھا۔
لبنانی وزارتِ صحت نے کہا ہے کہ ایک رہائشی عمارت پر ہونے والے فضائی حملے میں دو افراد جاں بحق جبکہ 20 افراد زخمی ہوئے ہیں۔
