ایک امریکی فوجی عہدیدار نے اعلان کیا ہے کہ ایران کی جانب سے کیے گئے حالیہ حملے، جن کے بارے میں اس نے کہا تھا کہ ان میں بحرین اور کویت میں واشنگٹن کے اڈوں کو نشانہ بنایا گیا ہے، کے نتیجے میں کوئی امریکی ہلاک نہیں ہوا اور نہ ہی تنصیبات کو کوئی شدید نقصان پہنچا ہے۔
اپنی شناخت نہ ظاہر کرنے کی شرط پر اس عہدیدار نے فرانس پریس ایجنسی (اے ایف پی) کو بتایا کہ ایران کی طرف سے داغے گئے تمام میزائل اور ڈرون طیارے مار گرائے گئے یا وہ شدید نقصان پہنچانے میں ناکام رہے۔
اسی دوران ایرانی فوج نے انکشاف کیا ہے کہ ملک کے جنوب میں امریکہ کی جانب سے کیے گئے حالیہ حملوں میں اس کے 8 اہلکار جاں بحق ہو گئے ہیں۔ سرکاری ٹیلی ویژن پر نشر کیے گئے فوج کے ایک بیان میں کہا گیا ہے کہ جنوبی ایران کے علاقوں پر امریکی حملوں کے نتیجے میں بندر عباس اور بوشہر میں فضائیہ اور بحریہ کے 8 اہلکار ہلاک ہوئے ہیں۔
80 سے زیادہ اہداف
واضح رہے امریکہ نے منگل کو ایران میں 80 سے زیادہ اہداف پر حملے کیے تھے۔ یہ حملے آبنائے ہرمز میں تجارتی بحری جہازوں کو نشانہ بنانے والے ایرانی حملوں کا جواب تھے۔ اس کے بعد تہران نے آج واشنگٹن کے حملوں کے جواب میں کویت اور بحرین میں امریکی اڈوں پر حملہ کرنے کا اعلان کیا۔ امریکہ نے بحری جہازوں پر حملوں کے بعد ایرانی تیل پر عائد پابندیوں میں عارضی نرمی کو بھی منسوخ کر دیا ہے۔
فریقین ایک دوسرے پر 17 جون کو دستخط کیے گئے مفاہمت کی اس یادداشت کی خلاف ورزی کا الزام عائد کر رہے ہیں جو 28 فروری کو ایران پر امریکی اور اسرائیلی حملوں سے شروع ہونے والی جنگ کے خاتمے کے لیے طے پائی تھی۔
