سعودی عرب اورکینیڈا کی آبنائےہرمزمیں آئل ٹینکروں پرحملوں کی مذمت...کشیدگی میں کمی پر زور

سعودی عرب اور کینیڈا نے آبنائے ہرمز میں آئل ٹینکروں کو نشانہ بنانے والی ایرانی خلاف ورزیوں اور خطے کے کئی ممالک پر ہونے والے حملوں کی مذمت کی ہے۔ دونوں ممالک نے کشیدگی میں کمی، مذاکرات کی راہ پر واپس آنے اور بات چیت کو ترجیح دینے کی ضرورت پر زور دیا ہے تاکہ علاقائی اور بین الاقوامی سطح پر امن و سلامتی کو یقینی بنایا جا سکے۔

یہ بات سعودی وزیر خارجہ شہزادہ فیصل بن فرحان کی جانب سے آج کینیڈا کی وزیر خارجہ انیتا آنند کے استقبال کے موقع پر سامنے آئی، جہاں دونوں عہدے داران نے خطے کی تازہ ترین صورت حال اور باہمی دل چسپی کے متعدد امور پر تبادلہ خیال کیا۔

سعودی وزیر خارجہ اور ان کی کینیڈین ہم منصب نے دونوں ممالک کے درمیان دو طرفہ تعلقات کا جائزہ لیا۔ ساتھ ہی مختلف شعبوں میں مشترکہ تعاون کو فروغ دینے کے طریقوں پر غور کیا، تاکہ باہمی مفادات کو پورا کیا جا سکے اور سعودی عرب اور کینیڈا کے درمیان شراکت داری کے وسیع تر امکانات کھل سکیں۔