ریاض ایئر نے بوئنگ 787 ڈریم لائنرز کا آرڈر بڑھا دیا، ایئربس اے 350-1000 کی تعداد میں اضافہ

ریاض ایئر نے منگل کے روز 28 بوئنگ 787 ڈریم لائنر طیاروں کے اضافی آرڈر کی تصدیق کی جو 39 سے بڑھ کر 67 ہو گئے۔

فارن بورو انٹرنیشنل ایئر شو میں اعلان کردہ معاہدے میں بوئنگ 787-10 کی ایک مختلف قسم بھی بیڑے میں شامل کی گئی ہے۔

ایکس پر ایک بیان میں ریاض ایئر نے کہا، توسیعی آرڈر سے ریاض کو 2030 تک 100 سے زیادہ مقامات سے منسلک کرنے کے عزائم کی حمایت ہوتی ہے۔

ریاض ایئر کے سی ای او ٹونی ڈگلس نے ایک بیان میں کہا، "اضافی 787 ڈریم لائنرز حاصل کرنے اور 787-10 کو متعارف کروانے کا عزم 2030 تک 100 سے زیادہ بین الاقوامی مقامات کی طرف ریاض ایئر کے سفر میں ایک اور اہم سنگِ میل کی نشاندہی کرتا ہے جو ملکت کے ویژن 2030 کے عزائم کا ایک اہم حصہ ہے۔"

ایئرلائن نے چھے اضافی ایئربس اے 350-1000 طیاروں کا آرڈر بھی دیا ہے جس سے اس قسم کے طیاروں کی تعداد بڑھ کر 31 ہو جائے گی۔

ریاض ایئر کے چیف فنانشل آفیسر ایڈم بوکادیدہ نے ایک پریس بیان میں کہا، "ان اضافی طیاروں کا حصول اس بات کی عکاسی کرتا ہے کہ ریاض ایئر کو اپنی ترقی کی رفتار اور سعودی عرب کے شعبہ ہوابازی کے مستقبل پر مسلسل اعتماد ہے۔"

نیز کہا، "اے 350-1000 طیاروں کی تعداد بڑھا کر 31 کر دینے سے ہمارے مستقبل کے نیٹ ورک کی بنیاد مضبوط ہو گی اور مہمان نوازی کا ایک اعلیٰ ترین تجربہ فراہم کرتے ہوئے 2030 تک 100 سے زیادہ عالمی مقامات تک رسائی کے عزائم کی حمایت ہو گی۔"

بیان میں کہا گیا کہ یہ معاہدہ ریاض ایئر کے 2025 میں اعلان کردہ 50 اے 350-1000طیاروں کے اصل عہد کا حصہ ہے۔

ریاض ایئر اے 350-1000 چلانے والی سعودی عرب کی اولین ایئر لائن بن جائے گی اور اس طیارے کو اپنے بین الاقوامی ترقی کے عزائم اور مملکت کے وژن 2030 کے مقاصد کی حمایت کے لیے استعمال کرے گی۔