.

شمالی وزیرستان میں امریکی ڈرون حملہ، چار افراد جاں بحق

فوری طور پر حملے میں مرنے والوں کی شناخت معلوم نہیں ہو سکی

پہلی اشاعت: آخری اپ ڈیٹ:

پاکستان کے وفاق کے زیر انتظام قبائلی علاقے شمالی وزیرستان میں بدھ کی رات امریکی سی آئی اے کے بغیر پائلٹ جاسوس طیارے کے میزائل حملے میں چار افراد جاں بحق ہوگئے ہیں۔

انٹیلی جنس اطلاعات کے مطابق امریکی ڈرون نے شمالی وزیرستان کے صدر مقام میران شاہ سے پانچ کلومیٹر جنوب میں واقع گاؤں قطب خیل میں ایک مکان پر دو میزائل داغے ہیں۔ فرانسیسی خبر رساں ادارے اے ایف پی نے اطلاع دی ہے کہ میزائل حملے میں تین مشتبہ جنگجو ہلاک ہوئے ہیں۔

لیکن میران شاہ میں ایک سکیورٹی عہدے دار نے حملے میں چار افراد کی ہلاکت کی اطلاع دی ہے اور کہا ہے کہ ایک اور جنگجو شدید زخمی ہے۔فوری طور پر اس ڈرون حملے میں مرنے والوں کی شناخت معلوم نہیں ہوسکی۔ پاکستانی انٹیلی جنس حکام نے شُبہ ظاہر کیا ہے کہ وہ افغان نژاد تھے۔