نوازشریف کو مودی کی حلف برداری میں شرکت کی دعوت

بھارت نے سارک ممالک کے تمام سربراہان حکومت کو دعوت نامے بھیج دیے

پہلی اشاعت: آخری اپ ڈیٹ:
مطالعہ موڈ چلائیں
100% Font Size
دو منٹ read

بھارت نے وزیراعظم پاکستان میاں نواز شریف کو نومنتخب وزیراعظم نریندر مودی کی 26 مئی کو حلف برداری کی تقریب میں شرکت کی دعوت دی ہے۔

بھارت میں منعقدہ حالیہ عام انتخابات میں اکثریت حاصل کرنے والی بھارتیہ جنتا پارٹی نے اس دعوت نامے کی تصدیق کی ہے اور جماعت کی ترجمان نرملا سیتھارام نے کہا ہے کہ جنوبی ایشیا کی علاقائی تعاون تنظیم (سارک) کے تمام رکن ممالک کے سربراہان حکومت کو مسٹر نریندر مودی کی حلف برداری کی تقریب میں شرکت کی دعوت دی گئی ہے۔

پاکستان کے دفتر خارجہ نے بھارت کی جانب سے باضابطہ طور پر یہ دعوت نامہ ملنے کی تصدیق کی ہے اور کہا ہے کہ بھارتی حکومت نے اسلام آباد میں انڈین ہائی کمیشن کے ذریعے یہ دعوت نامہ بھیجا ہے۔تاہم دفتر خارجہ کی ترجمان تسنیم اسلم کا کہنا ہے ابھی یہ فیصلہ نہیں کیا گیا کہ اس تقریب میں پاکستان کی نمائندگی کون کرے گا۔

ذرائع کا کہنا ہے کہ میاں نوازشریف اس ضمن میں اپنے قریبی مشیروں سے مشاورت کے بعد کوئی فیصلہ کریں گے۔واضح رہے کہ انھوں نے نریندر مودی کو ان کی جماعت کی بھارت میں منعقدہ حالیہ عام انتخابات میں شاندار کامیابی پر مبارک باد دی تھی اور انھیں پاکستان کے دورے کی دعوت بھی دے دی تھی جسے بعض حلقوں نے ایک عاجلانہ اقدام قرار دیا تھا۔

میاں نوازشریف نے گذشتہ سال مئی میں منعقدہ عام انتخابات میں اپنی جماعت پاکستان مسلم لیگ (نواز) کی کامیابی کے بعد بھارت کے سبکدوش ہونے والے وزیراعظم من موہن سنگھ کو اپنی حلف برداری کی تقریب میں شرکت کی دعوت دی تھی۔تاہم بعد میں پاکستانی حکومت کی جانب سے بھارت کو کوئی باضابطہ دعوت نامہ نہیں بھیجا گیا تھا۔

مقبول خبریں اہم خبریں

مقبول خبریں