پاکستان: وفاقی کابینہ نے آپریشن عزم استحکام کی منظوری دے دی

پاکستان کی وفاقی کابینہ نے نیشنل ایکشن کمیٹی کے اجلاس میں پیش کیے جانے والے مجوزہ "آپریشن عزم استحکام" کی منظوری دے دی۔

وزیراعظم شہباز شریف کی زیر صدارت منگل کے روز اسلام آباد میں ہونے والے وفاقی کابینہ کے اجلاس میں 11 نکاتی ایجنڈے پر غور کیا گیا۔

وفاقی کابینہ نے مالی سال 23-2022 کی قومی اقتصادی کونسل کی سالانہ رپورٹ پر غور کیا۔ اس موقع پر وفاقی کابینہ نے ای سی سی، سی سی ایل ایل سی اور کابینہ کمیٹی برائے حکومتی ملکیتی اداروں کے فیصلوں کی توثیق کی۔

وزیراعظم شہباز شریف نے مجوزہ آپریشن سے متعلق وضاحت کی کہ آپریشن عزم استحکام ماضی کے آپریشنز کی طرح نہیں ہے، عزم استحکام آپریشن میں عوام کو کسی قسم کی پریشانی کا سامنا نہیں کرنا پڑے گا۔ اس آپریشن سے آبادیوں کو نقل مکانی نہیں ہوگی اور یہ مخصوص علاقے میں نہیں ہوگا۔