ارشد ندیم کو ہلال امتیاز نواز دیا گیا، صدر پاکستان کا دس کروڑ روپے دینے کا اعلان

صدر مملکت آصف علی زرداری نے پیرس اولمپکس 2024 میں جیولن تھرو کے مقابلوں میں پاکستان کے لیے پہلا انفرادی گولڈ میڈل لانے والے ارشد ندیم کو ہلال امتیاز سے نواز دیا۔

ایوان صدر سے جاری پریس ریلیز کے مطابق ایوانِ صدر میں منعقدہ خصوصی تقریب میں صدر مملکت نے کھیل کے میدان نمایاں خدمات کے اعتراف میں ارشد ندیم کو اعلی سول ایوارڈ ہلال امتیاز عطا کیا۔

اس موقع پر صدر مملکت نے ارشد ندیم کیلئے اپنی جانب سے 10 کروڑ انعام کا بھی اعلان کیا ۔ تقریب کے بعد صدر مملکت آصف علی زرداری سے ارشد ندیم نے ملاقات بھی کی۔

اس موقع پر صدر مملکت نے کہا کہ ارشد ندیم نے اولمپک ریکارڈ بنا کر ملک کا سر فخر سے بلند کیا، انہوں نے ارشد ندیم کی شاندار کامیابی، مسلسل محنت اور لگن کو سراہتے ہوئے کہا کہ ارشد ندیم نے ملک کے لاتعداد نوجوان کھلاڑیوں کو بھی متاثر کیا۔

صدر مملکت نے کہاکہ پاکستان کو دیگر کھیلوں خصوصا سنگلز کو فروغ دینے کی ضرورت ہے، کھلاڑیوں کے بچوں کو اسکالر شپ دی جانی چاہیے، انہوں نے کہا کہ کھلاڑیوں کی فلاح و بہبود کیلئے سندھ حکومت کو پاکستان اسپورٹس بورڈ کے وقف فنڈ میں 25 کروڑ روپے کا حصہ ڈالنے کا کہوں گا۔