سعودی مملکت میں شاندار استقبال پر وزیر اعظم کا اظہار سپاس، سوشل میڈیا پر پیغام

وزیر اعظم شہباز شریف نے سعودی ولی عہد شہزادہ محمد بن سلمان کا شکریہ ادا کرتے ہوئے کہا ہے کہ وہ اپنے عزیز بھائی کی جانب سے دیے گئے شاندار استقبالیے پر دل کی گہرائیوں سے شکر گزار ہیں۔

جمعرات کی صبح سوشل میڈیا پلیٹ فارم ایکس پر جاری بیان میں وزیر اعظم نے کہا کہ ’سعودی شاہی فضائیہ کے ایف پندرہ جدید لڑاکا طیاروں کی جانب سے میرے جہاز کو اپنے حصار میں لینے اور سعودی مسلح افواج کے گارڈ آف آنر پیش کرنے تک، یہ استقبال پاکستان اور سعودی عرب کے درمیان محبت اور باہمی احترام کا اظہار ہے۔‘

وزیر اعظم کے مملکت میں فقید المثال استقبال کے بعد اسلام آباد انتظامیہ کو فوری احکامات جاری کیے گئے۔ ان احکامات کے تحت دارالحکومت کی عمارتوں کو روشنیوں سے سجایا گیا ہے۔ پاک سعودی ٹاور سمیت اسلام آباد کی عمارتیں سبز روشنیوں سے جگمگا رہی ہیں ، یہ تمام اقدامات وزیر اعظم کے دورہ سعودی عرب کے تناظر میں کیے گئے ہیں۔