پاکستان میں اولین عالمی مقابلۂ حسنِ قرأت کا انعقاد، 40 ممالک کے قراء کرام شریک

پاکستان کے دارالحکومت اسلام آباد میں پیر کو شروع ہونے والے اولین بین الاقوامی مقابلۂ حسنِ قرأت میں 40 سے زائد ممالک کے قاریانِ کرام حصہ لے رہے ہیں۔

پانچ روزہ بین الاقوامی مقابلۂ قرأت (آئی کیو سی-2025) میں اسلامی تعاون تنظیم (او آئی سی) کے 40 سے زائد رکن ممالک کے قراء کرام کتابِ مقدس کی تلاوت کے لیے مجتمع ہوں گے۔

پینل میں تین بین الاقوامی اور پانچ پاکستانی ججز شامل ہیں۔ مقابلے میں پاکستان سے بھی ایک قاری شریک ہوں گے۔

پاکستان کی وزارتِ مذہبی امور کے رکن اور تقریب کے رابطہ کار قاری سید صداقت علی نے کہا، "جب 40 اقوام کی آوازیں ایک ہی چھت تلے ایک ہی کلماتِ الٰہیہ کی تلاوت کرتی ہیں تو یہ ہمیں یاد دلاتا ہے کہ قرآن کس طرح سرحدوں کے پار دلوں کو ملاتا ہے۔"

کیپشن: پاکستان کا اولین عالمی مقابلۂ حسنِ قرأت 24 نومبر 2025 کو اسلام آباد میں جاری ہے۔ (اے این)

ججز فنِ تجوید کی بنیاد پر قرآن کی تلاوت کرنے والوں کی کارکردگی کا جائزہ لیں گے۔ اس سے مراد کتابِ مقدس کی تلاوت کے قواعد کا اطلاق، الحان، تال اور تلاوت کے روحانی اثرات ہیں۔

تقسیمِ انعامات کی عظیم الشان تقریب 29 نومبر کو جناح کنونشن سینٹر اسلام آباد میں ہو گی جس میں فاتحین کو انعامات سے نوازا جائے گا۔ توقع ہے کہ ریاستی سطح کے معززین اختتامی اجلاس کی صدارت کریں گے۔

مقابلے کے آغاز پر اپنے خطاب میں وزیرِ مذہبی امور سردار محمد یوسف نے امید ظاہر کی کہ یہ تقریب پاکستان میں عربی زبان کے فروغ میں معاون ثابت ہو گی۔

یوسف نے کہا، "یہ دنیا و آخرت میں کامیابی کا باعث بنے گا۔ عربی قرآن کی زبان ہے اور اسے سیکھنا ہم سب پر لازم ہے تاکہ ہم قرآن پاک کو پڑھ،سمجھ اور اس پر عمل کر سکیں۔"

فلسطین کے قاری نبیل محمد علی شرابتی نے تقریب میں شرکت اور دیگر اسلامی ممالک کے ساتھیوں سے ملنے پر بہت خوشی کا اظہار کیا۔

شرابتی نے کہا، "ہم یہاں پاکستان میں خوبصورتی سے قرآنِ کریم کی تلاوت کرنے اور مقابلہ کرنے کے لیے جمع ہیں۔"

کیمرون کے ایک قاری نور الدین حسن نے بھی انہی جذبات کا اظہار کیا۔

حسن نے عرب نیوز کو بتایا، "میں یہاں آکر اور اپنے ملک کی نمائندگی کر کے، تمام دنیا کے دیگر ممالک کے لوگوں سے مل کر، اپنے علمِ قرآن اور قرأت و تلاوت کا اشتراک کرنے اور اپنے تمام بھائیوں کی تلاوت سن کر بہت خوش ہوں۔"