جیو نیوز: محرم کی دستاویزی فلم پر 15 روزہ معطلی کے بعد نشریات دوبارہ شروع ہو گئی ہیں

جیو نیوز نے کہا ہے کہ اس کی نشریات 15 روزہ معطلی کے بعد اتوار کو دوبارہ شروع ہو گئیں جو پاکستان الیکٹرانک میڈیا ریگولیٹری اتھارٹی (پیمرا) کی جانب سے محرم کی ایک دستاویزی فلم نشر کرنے پر معطل کی گئی تھیں۔

پیمرا نے 27 جون کو جیو نیوز کا لائسنس 15 دن کے لیے معطل کر دیا کیونکہ اس نے ایک روز قبل محرم کا خصوصی پروگرام نشر کیا تھا۔ پاکستانی میڈیا ریگولیٹر نے کہا کہ ٹرانسمیشن میں ایسا "مذہبی تصور" شامل تھا جو لوگوں کے جذبات مجروح کرنے، مذہبی ہم آہنگی کو نقصان پہنچانے اور امنِ عامہ کو خراب کرنے کی صلاحیت رکھتا تھا۔ پیمرا نے براڈکاسٹر پر 10 ملین روپے کا جرمانہ بھی عائد کیا۔

اس کے بعد چینل نے غیر مشروط عوامی معافی نامہ جاری کیا، پروگرام کی تیاری میں ملوث ملازمین کو برخاست کر دیا اور اضافی ادارتی تحفظ متعارف کروایا۔ چینل نے کہا کہ محرم ٹرانسمیشن کے دوران مواد غلطی سے نشر ہوا اور اس میں عراق اور شرقِ اوسط میں کسی خاص مذہبی عقیدے کی توثیق کرنے کے بجائے بعض لوگوں میں رائج رسومات دکھائی گئی تھیں۔

عرب نیوز کی ملاحظہ کردہ حکم نامے کی ایک نقل کے مطابق "معطلی کی مدت مکمل ہونے اور جرمانے کی ادائیگی کے بعد ہی ٹرانسمیشن دوبارہ شروع ہو سکتی ہے۔"

ریگولیٹر نے کہا کہ اس نے چینل کی طرف سے غفلت کے اعتراف، اظہارِ پشیمانی اور غیر مشروط عوامی معافی کو مدِنظر رکھا ہے لیکن یہ نتیجہ اخذ کیا کہ ان عوامل سے خلاف ورزی یا اس کے قانونی نتائج ختم نہیں ہوئے۔

اس نے جیو نیوز کو نشریات کے ذمہ داروں کو برطرف کرنے کی ہدایت بھی کی۔ نیز کہا کہ خلاف ورزی پر برطرف کردہ افراد قابلِ اطلاق قانون کے تحت مستقبل میں ملازمت یا اتھارٹی کےیلائسنس یافتہ یا ریگولیٹ کردہ کسی بھی سروس سے وابستہ ہونے کے اہل نہیں ہوں گے۔

پیمرا نے براڈکاسٹر کو حکم دیا کہ وہ ہدایات کی تعمیل کی تصدیق کرنے والا حلف نامہ جمع کروائے اور خبردار کیا کہ دوبارہ خلاف ورزی کے نتیجے میں اس کے لائسنس کی معطلی یا منسوخی میں اضافہ ہو سکتا ہے۔

فیصلے میں تمام لائسنس یافتہ اداروں کو بھی یہ ہدایت کی گئی ہے کہ وہ غیرجانبدار اندرونِ خانہ مانیٹرنگ کمیٹیاں یا ادارتی بورڈ قائم کریں، ریگولیٹر کو ان کی تشکیل کی اطلاع دیں اور ہر نشریات کی پیشگی ادارتی جانچ کو یقینی بنائیں۔

پاکستان کے ایک سب سے بڑے نجی ٹیلی ویژن چینلز جیو نیوز نے کہا ہے کہ مذکورہ دستاویزی فلم کو اس کے تمام پلیٹ فارمز سے ہٹا دیا گیا ہے۔