مسجد نبوی کی تعمیر و توسیع کے انسائیکلو پیڈیا کے پہلے حصے کا اجرا

المدینہ المنورۃ ریجن کے گورنر شہزادہ فیصل بن سلمان نے مسجد نبوی کے انسائیکلوپیڈیا آف آرکیٹیکچر کے پہلے حصے کے اجراء کی تقریب میں شرکت کی۔ اس انسائیکلو پیڈیا میں ہجرت کے پہلے سال سے مملکت کی توسیع تک حرم مدنی کی تعمیر میں ہونے والی پیش رفت کو مرتب کیا جائے گا۔

اس انسائیکلو پیڈیا کا افتتاح خادم حرمین شریفین شاہ سلمان بن عبد العزیز نے 1440 ھجری میں کیا تھا۔

شہزادہ فیصل نے تقریب میں کہا کہ انسائیکلوپیڈیا کا مقصد ایک متحد انسائیکلوپیڈیک ماخذ تیار کرنا ہے جس کی مدد سے مطالعہ، ڈرائنگ، تصاویر، نقشے اور خصوصی انجینئرنگ کی معلومات دستیاب ہوں گی۔

مدینہ کے امیر شہزادہ فیصل بن سلمان کی تقریب میں شرکت

ان کا مزید کہنا تھا کہ مسجد نبوی کے فن تعمیر کی ترقی کے مراحل اور شرعی احکام کی بنیاد پر تعمیراتی بنیادوں کا استحکام واضح کیا جائے گا۔

ماہرین، مورخین اور مسجد نبوی کے فن تعمیر سے وابستہ افراد اور اس کے ذمہ داروں کی نگرانی میں دستاویز تاریخی تناظر میں مرتب کی جارہی ہے۔

انہوں نے کہا کہ انسائیکلوپیڈیا کا مقصد مسجد نبوی کے فن تعمیر کی دیکھ بھال اور اس کی توسیع، اصلاحات اور بحالی میں مملکت کی مسلسل کوششوں کے ساتھ ساتھ اسلامی فن تعمیراتی فنون کے جمالیاتی پہلوؤں کو اجاگر کرنا بھی ہے۔ مسجد نبوی کے فن تعمیر اور تاریخ کو مرتب کرکے اسلامی فن تعمیر کی لائبریری کو مزید تقویت بھی دی جائے گی۔