سعودی سوشل میڈیا پر خوفناک کار حادثے میں زندہ بچنے والے طالب علم کے استقبال کی ویڈیو

سعودی عرب میں ایک خوفناک کار حادثے کے بعد دوبارہ اسکول آنے والے طالب علم کے استقبال کی ویڈیو سوشل میڈیا پر بہت زیادہ دیکھی جا رہی ہے۔

بریدہ کے ابن عقیل ایلیمنٹری اسکول میں طلبہ اپنے ایک ساتھی ایاد الذیاب کی صحت یابی کا جشن منا رہے ہیں، مگر ان ہنستے چہروں کے درمیان کم سن "ایاد" افسردہ دکھائی دیتے ہیں کیونکہ اس سے چند ہی روز پہلے ایک ٹریفک حادثے میں انہوں نے اپنی ماں، جڑواں بہن اور اپنی ایک ٹانگ کھو دی تھی۔

ماں اور جڑواں بہن کی موت

نوجوان ایاد الذیاب کے والد نے العربیہ کو اس حادثے کے بارے میں بتایا کہ "عمرہ سے واپسی کے دوران گاڑی کا ٹائر پھٹ گیا اور ان کی گاڑی سڑک پر الٹ گئی۔"

اس حادثے میں ان کی اہلیہ اور بیٹی ، جو کہ ایاد کی جڑواں بہن تھی، کی موت واقع ہوئی۔ جب کہ بیٹا ایاد ایک ٹانگ کھو بیٹھا۔
ویڈیو میں ایاد ایک ویل چیئر پر اسکول میں داخل ہوتے ہیں جہاں اساتذہ اور طلباء نے ان کا استقبال کیا، گلے لگایا، اور انہیں پھول اور تحائف پیش کیے۔

سوشل میڈیا پر جہاں لوگوں نے اسکول کے اساتذہ اور طلباء کی طرف سے انسانی ہمدردی کے اس اقدام کی تعریف کی۔

وہیں ایاد کے لیے ہمدردی کے پیغامات بھی بھیجے، جو لوگوں کی گرمجوشی کے باوجود اپنے ساتھ ہوئے المناک سانحے کی وجہ سے غم اور اداسی چھپا نہیں پائے۔