ایک سادہ سی عادت تناؤ کو کم اور جسم کا توازن بحال کر سکتی ہے: تحقیق
ایک حالیہ سائنسی تحقیق سے انکشاف ہوا ہے کہ باقاعدگی سے ورزش کرنا محض نفسیاتی حالت پر ہی نہیں بلکہ جسم کی حیاتیات پر براہ راست اثر ڈال کر ذہنی تناؤ کے احساس کو کم کرنے میں مددگار ثابت ہو سکتا ہے۔ سائٹیک ڈیلی کی شائع کردہ رپورٹ کے مطابق یہ تحقیق جریدے "سپورٹ اینڈ ہیلتھ سائنس" میں شائع ہوئی ہے اور اس کی بنیاد اپنی نوعیت کا پہلا طبی تجربہ ہے۔ اس تجربے میں ایک سال تک جسم پر ایروبک ورزشوں کے اثرات کا جائزہ لیا گیا ہے۔
امریکی یونیورسٹی آف پٹسبرگ کی ایک ٹیم نے اس تحقیق کی قیادت کی اور جسمانی سرگرمیوں کی سفارشات پر عمل درآمد کے اثرات پر توجہ مرکوز کی، خاص طور پر ہفتہ وار 150 منٹ کی معتدل سے سخت ایروبک ورزش پر توجہ دی گئی۔ تحقیق میں 130 بالغ افراد شامل تھے جنہیں دو گروپوں میں تقسیم کیا گیا۔ پہلے گروپ نے ایک سال تک باقاعدہ ورزشی پروگرام پر عمل کیا۔ دوسرے گروپ نے اپنی سرگرمیوں میں تبدیلی لائے بغیر صرف عمومی طبی ہدایات حاصل کیں۔ مطالعے کے دوران محققین نے کئی اشاریوں کی نگرانی کی جن میں سب سے اہم کورٹیسول ہارمون کی سطح ہے جسے تناؤ کا ہارمون کہا جاتا ہے۔ اس کے ساتھ ساتھ جسمانی فٹنس اور دماغی افعال کی پیمائش بھی کی گئی۔
تناؤ کے ہارمون میں واضح کمی
نتائج سے معلوم ہوا کہ جن شرکاء نے باقاعدگی سے ورزش کی، ان کے یہاں دوسرے گروپ کے مقابلے میں طویل مدت میں کورٹیسول کی سطح میں نمایاں کمی ریکارڈ کی گئی۔ کورٹیسول نیند، قوتِ مدافعت اور یادداشت جیسے اہم حیاتیاتی افعال کو منظم کرنے میں بنیادی عنصر ہے لیکن اس کی سطح کا مستقل بلند رہنا دل کی بیماریوں، میٹابولک عوارض اور نفسیاتی مسائل کے خطرے کو بڑھا دیتا ہے۔
ان نتائج کی اہمیت اس لیے زیادہ ہے کیونکہ ماضی کی زیادہ تر تحقیقات مشاہداتی تعلق پر مبنی تھیں۔ یہ تحقیق ایک طویل مدتی بے ترتیب تجربے پر مبنی ہے جو اس تعلق کی وضاحت میں زیادہ مستند حیثیت رکھتی ہے۔ تاہم محققین کا کہنا ہے کہ نتائج ورزش اور تناؤ میں کمی کے درمیان مضبوط تعلق تو ظاہر کرتے ہیں لیکن یہ دعویٰ نہیں کیا جا سکتا کہ یہ واحد اثر انداز ہونے والا عنصر ہے۔ اس کی وجہ یہ ہے کہ طرزِ زندگی اور غذا جیسے دیگر عوامل بھی کردار ادا کرتے ہیں۔
نتائج نے یہ بھی بتایا کہ ایروبک ورزشیں جذبات کو بہتر طور پر قابو کرنے میں معاون ثابت ہو سکتی ہیں اور شاید دماغ کے بوڑھا ہونے کے کچھ اثرات کو بھی سست کر دیں۔ اس سے مجموعی صحت کی حمایت میں اس کا کردار مزید واضح ہوجاتا ہے۔ تحقیق اس بات پر زور دیتی ہے کہ باقاعدہ جسمانی سرگرمی پر کاربند رہنا، چاہے وہ ہفتہ وار 150 منٹ ہی کیوں نہ ہو، تناؤ کو کم کرنے اور زندگی کے معیار کو بہتر بنانے کا ایک عملی اور براہ راست ذریعہ ہو سکتا ہے۔ بڑھتے ہوئے روزمرہ کے دباؤ کے پیشِ نظر ورزش طویل مدتی جسمانی اور نفسیاتی توازن برقرار رکھنے کے لیے ایک سادہ مگر مؤثر انتخاب ہوسکتی ہے۔
