مکہ مکرمہ میں واقع مہمان نوازی کی سہولیات میں لائسنس یافتہ کمروں کی تعداد تین لاکھ سے تجاوز کر گئی ہے، جو سال 2024 ءکی پہلی سہ ماہی کے مقابلے میں 2025ء کی پہلی سہ ماہی میں 41 فیصد اضافہ ظاہر کرتی ہے۔
سعودی وزارتِ سیاحت نے مکہ مکرمہ کی ان 1,160 سے زائد لائسنس یافتہ رہائش گاہوں کا معائنہ اور نگرانی کی تاکہ اس امر کو یقینی بنایا جا سکے کہ وہ حج سیزن کے دوران ضیوف الرحمٰن کو بہترین خدمات فراہم کرنے کے لیے مکمل طور پر تیار ہیں۔
مکہ مکرمہ میں لائسنس یافتہ رہائشی کمروں میں اس قابلِ ذکر اضافے کو وزارتِ سیاحت کی ان مسلسل کوششوں کا نتیجہ قرار دیا جا رہا ہے جن کا مقصد حجاج کرام کو اعلیٰ معیار کی خدمات فراہم کرنا ہے، تاکہ وہ حج 1446 ھ کے دوران اطمینان اور سہولت کے ساتھ اپنے مناسک ادا کر سکیں۔
یہ اقدامات حکومت کے متعلقہ اداروں کے ساتھ وزارت سیاحت کی ہم آہنگ اور مشترکہ کوششوں کا حصہ ہیں، جن کا مقصد اللہ کے مہمانوں کے لیے زیادہ سے زیادہ آسانیاں اور آرام دہ ماحول فراہم کرنا ہے۔
