دبئی :مارشل آرٹس کی ماہر مسلم خاتون داؤ پیچ لڑائیں گی

ملائشیا سے تعلق رکھنے والی مکسڈ مارشل آرٹس کی پہلی خاتون پروفیشنل این عثمان اس ماہ دبئی میں میدان میں اتررہی ہیں اور وہ باکسنگ کی سابق عالمی چیمپئن کے مدمقابل ہوں گی۔وہ کسی مسلم ملک میں پروفیشنل مارشل آرٹس کا مظاہرہ کرنے والی پہلی مسلمان خاتون ہوں گی۔

این عثمان نے ایک مختصر انٹرویو میں بتایا ہے کہ ''پہلے پہل جب میں نے مکسڈ مارشل آرٹس( ایم ایم اے) سیکھنا شروع کیا تھا تو مجھے یہ اندازہ نہیں تھا کہ ایک مسلم خاتون ہونے کے ناتے میں اس کھیل میں کیسے اپنے فن کا مظاہرہ کرپاؤں گی لیکن جب میں نے ایم ایم اے کا آغاز کیا اور مسلم دوستوں نے میری حوصلہ افزائی کی تو پھر مجھے پتا چلا تھا کہ درحقیقت میں کیا کررہی ہوں''۔

28 سالہ این عثمان دبئی میں ''ون فائٹنگ چیمپئن شپ'' میں حصہ لیں گی اور ان کے مد مقابل باکسنگ کی سابق عالمی چیمپئن اینا جولاٹن ہوں گی۔ان کے درمیان یہ مقابلہ 29 اگست کو دبئی کے ورلڈ ٹریڈ سنٹر میں منعقد ہوگا۔