یورپی یونین کی شام پر پابندیوں میں ایک سال کی توسیع

یورپی یونین نے شامی صدر بشارالاسد اور ان کے مصاحبین پر عاید پابندیوں میں مزید ایک سال کے لیے توسیع کردی ہے اور پابندیاں کا شکار شامی عہدے داروں کی فہرست میں ایک اعلیٰ فوجی عہدے دار کا نام بھی شامل کر لیا ہے۔

یورپی یونین نے سنہ 2011 ء میں شامی حکومت کے اپنے مخالف شہریوں کے خلاف کریک ڈاؤن کے بعد صدر بشارالاسد اور ان کے حامیوں کے خلاف پابندیاں عاید کرنے کے سلسلے کا آغاز کیا تھا۔اب تک یورپی یونین دو سو زیادہ شامی شخصیات اور ستر اداروں پر پابندیاں عاید کرچکی ہے۔اس اقدام کے تحت ان کے یورپی ممالک میں اثاثے منجمد کر لیے گئے ہیں اور ان پر سفری پابندیاں عاید ہیں۔

یورپی یونین کی حکومتوں نے اب شام کے ایک اعلیٰ فوجی عہدے دار پر بھی سفری پابندیاں عاید کردی ہیں اور یورپی ممالک میں ان صاحب کے اثاثے منجمد کر لیے گئے ہیں۔تاہم آج جمعہ کو یورپی یونین کے جرنل کی اشاعت تک اس شامی فوجی افسر کا نام ظاہر نہیں کیا گیا ہے۔اس اعلیٰ فوجی افسر پر دمشق اور اس کے نواحی علاقوں میں شہریوں کو تشدد کا نشانہ بنانے اور ان پر جبرواستبداد کے حربے آزمانے کے الزامات ہیں۔

یورپی یونین نے شام کو ایسا مواد برآمد کرنے پر پابندی عاید کررکھی ہے جو لوگوں کو جبرواستبداد کا نشانہ بنانے کے لیے استعمال ہوسکتا ہو۔اس کے علاوہ شام سے یورپی ممالک میں تیل درآمد کرنے پر بھی پابندی ہے۔