.

بھارتی فرم کا روس سے 6 ارب ڈالرز کا دفاعی معاہدہ

پہلی اشاعت: آخری اپ ڈیٹ:

بھارت کی دفاعی سازوسامان تیار کرنے والی فرم ریلائنس ڈیفنس نے روس کے فضائی دفاعی نظام تیار کرنے والے ادارے الماز آنتے کے ساتھ چھے ارب ڈالرز مالیت کا ایک معاہدہ کیا ہے۔

بھارت کے ارب پتی انیل امبانی کی ملکیتی فرم اور روسی فرم کے درمیان اس دفاعی سودے کا اعلان بھارتی وزیراعظم نریندر مودی کے ماسکو کے دورے کے موقع پر کیا گیا ہے۔

اسی ہفتے بھارت کی وزارت دفاع کے ذرائع نے بتایا تھا کہ حکومت نے پانچ ایس 400 فضائی دفاعی نظام کی خریداری کی منظوری دے دی ہے۔اس سے ملک کے دفاعی نظام کو جدید بنانے میں مدد ملے گی۔

ریلائنس ڈیفنس نے جمعرات کو جاری کردہ ایک بیان میں کہا ہے کہ ''طرفین نے فضائی دفاعی میزائل نظام ،راڈار اور خودکار کنٹرول نظام کی شراکت داری کے شعبوں کے طور پر نشان دہی کی ہے۔اس کے علاوہ بھارت کی وزارت دفاع کی آف سیٹ پالیسی میں بھی تعاون کیا جائے گا''۔

اس آف سیٹ پالیسی کے تحت دفاعی شعبے میں عالمی ٹھیکے دار کسی بھارتی کے ساتھ معاہدے کی صورت میں اس کی کل لاگت کی ایک خاص شرح بھارت میں دفاعی صنعت پر لگانے کے پابند ہیں تا کہ اس کا دوسرے ممالک پر دفاعی شعبے میں انحصار بتدریج کم کیا جاسکے۔واضح رہے کہ بھارت اس وقت دنیا بھر میں اسلحے کا سب سے بڑا خریدار ملک ہے۔

بھارت اپنی فوج کی دفاعی صلاحیت کو آیندہ ایک عشرے کے دوران اپ گریڈ کرنے کے لیے ڈھائی سو ارب ڈالرز خرچ کرنے کا ارادہ رکھتا ہے اور مودی سرکار اس معاملے میں بھارتی حکومت اور دفاعی فرموں کے لیے زیادہ کردار چاہتی ہے۔

ریلائنس ڈیفنس روس کے ساتھ دفاعی شعبے میں کاروبار کو فروغ دینے کے لیے کوشاں ہے۔اس کا کہنا ہے کہ اس نے الماز آنتے کے سسٹمز کو جدید بنانے اور اس کی مرمت کے ایک مشترکہ منصوبے پر عمل درآمد کے لیے بھی تبادلہ خیال کیا ہے۔

یہ کمپنی ہیلی کاپٹروں ،آبدوزوں اور جہازوں کے مقامی تیار کنندگان کے لیے ٹھیکے حاصل کرنے کا بھی ارادہ رکھتی ہے۔اسی ماہ کے اوائل میں امبانی کی ملکیتی ریلائنس انفرااسٹرکچر نے پپاواو ڈیفنس اور آف شور انجنیرنگ کمپنی کا کنٹرول سنبھال لیا تھا۔یہ کمپنی بھارتی بحریہ کے لیے پیٹرول کشتیاں تیار کرتی ہے۔